“Mi intuishon” di DjuDju-V tin e kaya den su gara

267
Su tumba “Mi intuishon” tin e pueblo den su gara. 

WILLEMSTAD,—-Awe nos ta riba e di 10 dia despues di final di festival di tumba 2020, kaminda ku ya e resultado ta konosí pa tur hende. Pero manera ku a yega di pasa na algun okashon ku tin un tumba ta sali djatras i para bira e tumba mas gustá den un tempu hopi kòrtiku.

Mester bisa ku Ray Lauffer sin duda a gana festival di tumba sin ningun klase di diskushon. Tambe nos tin ku bisá aserka ku Amos Balentin tambe ta para fuerte komo promé finalista. Ningun hende no ta diskutí rondó di e dos finalista nan aki.

Pero loke ku a pasa ku Amos Balentin na aña 2013, ta pasando ku e kantante tumbero DjuDju-V e aña aki. Hopi hende no a mira DjuDju-V su tumba durante di su dos presentashon nan den Curaçao Festival Center, esta dia 28 i final di den mardugá di djabièrnè pa manisé di djasabra.

Loke ku a bira e tópiko di djadumingu dia 2 di febrüari ta ku tur hende ta bisa ku e tumba di DjuDju-V ku su titulo ta “Mi intuishon” ta bai bira e tumba di kaya i e tumba mas popular. No tin duda ku tumba tambe tin su buèlta nan kuné.