“Monchi” no sa unda ni kiko nan a hasi ku benta UTS

733
Mesa: miembronan di Cft ayera durante rueda prensa.
Otrobanda—Presidente di Komishon Supervishon Finansiero, Cft, Raymond “Monchi” Gradus no sa unda e plakanan generá riba benta di UTS ta ni tampoko kiko a sosodé despues ku a bende e kompania di telekomunikashon. Esaki ta lokual e la duna di konosé ayera durante un rueda di prensa na ofisina di Cft riba Rouvilleweg, Otrobanda.
Gradus: Raymond Gradus ayera na Otrobanda.

Segun Gradus a keda kumbiní pa invertí e sèn di benta pa stimulá ekonomia di Kòrsou. Pero realmente e mes no sa muchu di e sèn. E la menshoná di na altura ku CMC lo a risibí un parti pa finansiá nan operashon, pero mas e no por bisa. Kálkulonan ta indiká ku UTS a bende su akshonnan na Liberty Latin America pa 339 mion florin i despues di deskontá obligashonnan finansiero retrasá, alrededor di 137 mion florin por bai pa gobièrnu. Promé Minister Eugene Rhuggenaath a proponé na presidente di e PMO Groestrategie pa pone e plaka di benta den diferente bolsa, ménos esun pa finansiá défisit di gobièrnu. Rhuggenaath riba 22 2019,  a duna un konseho adishonal  pa lokual ta regardá entrada generá ku benta di UTS: 40% di plaka bai den bolsa di Curacao Development Institute. N’e momentunan aki konseheronan fo’i Ulanda, kende no tin nada di haber ni ku Kòrsou, UTS òf hasta CDI, ta transformando CDI di tal forma ku tur lokual nan a risibí fo’i benta di UTS ta subi kuenta di un banko di invershon ku tei yama Invest Curaçao. Invest Curacao ta spesífikamente lokual tin preskribí den e Akuerdo dim Kresementu, lokual ayera Gradus a menshoná un parti di dje.

Invest Curacao , ta algu ku tantu Cft komo promé minister Rhuggenaath  a menshoná ku tei bini. 40% ta nifiká ku entre 50 pa 60 mion florin fo’i e benta di UTS, lo subi kuenta di Invest Curacao. Otro 40%, entre fo’i benta di UTS, ta bai invertí den drechamentu di aparato públiko i mehorashon di servisio gubernamental. Segun Gradus a menshoná, mester invertí den un mihó sistema di kobransa i kisas esaki en bèrdat lo nifiká un invershon den drechamentu di e kapasidat organisatorio pa kobra mas impuesto. Demas 20% ta bai invertí den reformashon di struktura sosial. Ora kaba di deskontá tur kos for di e 339 mion florin ku gobièrnu a bende UTS, ta keda 1.1 mion pa subi kuenta general di gobièrnu di Kòrsou. Esaki segun minister di finansas, Kenneth Gijbertha.

Den e forma aki a keda kumbiní ku tur benta dia akshonnan di UTS ta wòrdu depositá riba kuenta di CDI unda despues lo bini repartishon na un banko unda ulandesnan ta konsehando minister Gijsbertha. Kontenido di e repartishon no ta konosí, pero ta papiando di 40-40-20 %, konforme konseho di PMO.  For di 30 di yüli 2019 PMO i ministernan den kabinete mester duna proposishonnan konkreto riba proyektonan i programa ku ta bini na remarke pa usa fo’i dje bolsa di benta neto, kasi 140 mion florin. N’e momentunan aki, parti di e sèn ta depositá riba un kuenta na CBCS. E suma eksakto no ta konosí.•