Negoshashon tumando lugá pa Rei Ray presentá na Aruba djasabra awó

180
E no tin ora i porta e dianan aki.    

WILLEMSTAD,—-Di informashon ku a drenta na mesa di redakshon di ‘E Mulina’, direktamente for di pais ruman Aruba, ta bisá ku tin negosiashonnan ta tumando lugá, entre Manager di Rei di Tumba 2020 Rei ‘Ray’ ku ta Zaidi Hasham i Daren Van Ommeren di Aruba.

Tur esaki ta pa nos Rei di Tumba 2020, presentá den e anochi final di Festival di tumba na Aruba. Mester bisa ku e interes pa Rei ‘Ray’ presentá e wikènt aki na Aruba ta hopi grandi. T’asina ku ‘E Mulina’, a drenta den kontakto ku Manager di Rei ‘Ray’ i nos a bisé di e informashon ku nos ta disponé di dje.

T’asina ku Zaidi Hasham a bisá ‘E Mulina’, ku bèrdat tin interes pa ‘Ray’ presentá na Aruba djasabra awó. “Pero esaki lástimamente no por ta posibel, pasó e dianan pa e desishon mester a kai, a pasa i esaki a poné ku mi tambe mester a tuma algun desishon na Kòrsou pa ku algun kompromiso ku ‘Jump In’ nan aki na Kòrsou mes”, Hasham a deklará.

Pues na final ‘E Mulina’, mester bisá ku nos Rei di tumba 2020, Rei ‘Ray’ ta keda Kòrsou e wikènt aki, i esaki ta nifiká ku tur hende por bai bula baila ku nos Rei di tumba. Si, tantu ‘Ray’ i su manager mester sinti nan mes orguyoso di asina tantu interes ku tin for di Aruba pa mira ‘Ray’ presentá su tumba ganadó.