Otmar Dijk a tuma retiro definitivo for di Classic XD

122
E no ta forma parti mas di XD.

WILLEMSTAD,—-For di siman pasá ‘E Mulina’, a trese e informashon ku tur kos ta indiká ku e trompetista Otmar Dijk ku ta forma parti di agrupashon musikal Classic XD, lo bai entregá su karta di retiro. Mas despues nos a haña informashon ku gerente di e banda ariba menshoná, a manda bisa Otmar ku pa djabièrnè atardi, nan mester haña su kontesta.

Djabièrnè tras di lomba tabata final di Festival di Tumba i no ta un sekreto ku agrupashon musikal XD tambe a partisipá den e anochi final, kaminda ku nan a kompañá e kantante Tico Libiee. Pero ayera mainta ‘E Mulina’, a keda poné na altura ku Otmar Dijk, mes a tuma su retiro for di agrupashon musikal Classic XD.

Esaki ta nifiká ku e informashon ku ‘E Mulina’, a trese siman pasá ta kuadra ku realidat, apesar ku for di diferente kanal tabatin hopi ningamentu. Pero manera semper ku ‘E Mulina’, su lema ta “Tempu ta e mihó maestro”.

Un biaha mas ta bolbe demostrá ku nos a bolbe haña rason. Den mes un rosea ‘E Mulina’, a haña informashon ku ya gerente di Classic ta den negoshashon ku un otro trompetista i ku no ta bai dura hopi ku nan lo bai present’é na nan fanátikonan.