Parlamentario Stephen Walroud na fabor pa kambio den lei di screening

Interes general riba tur kos p’é

100
WILLEMSTAD—Na momentu ku Gabinete Betrian a keda instalá na 2012, e promé tarea ku e gobièrnu interino a traha riba dje ta e lei di screening. Manera ta konosí e lei aki a keda aprobá djis despues di kaida di Gabinete Schotte. E pensamentu for di un prinsipio tabata ku mester introdusí e lei aki pa asina evitá ku entre otro Gerrit Schotte lo a sinta riba e stul komo mandatario den futuro serkano. Na momentu ku e lei aki a keda kla a start mesora ku persekushon di Gerit Schotte i sobra miembronan prominente di MFK.

Tantu Gerrit Schotte komo Jacintha Constancia a keda kondená ku tempu, kua lo a trese kuné ku nan lo no por a sinta komo minister si yega asina leu ku tin formashon di un gobièrnu ku partisipashon di MFK aden. Esaki tabata hustamente e kaso na 2017 na momentu ku Gerrit Schotte mester a hala un banda pa Gilmar Pisas a sinta komo promé minister di Kòrsou. Ta resultá awor ku e lei di screening a dal mandatarionan dje 2 partidonan di mas grandi i awor a disidí ku mester trese kambio na esaki. Manera ta konosí n’e momentunan aki tin 2 figura prominente di tantu PAR komo MAN ku a keda afektá pa e lei di screening, manera ku e ta hinka den otro na e momentunan aki, tresiendo kuné ku den seno di ámbos organisashon a lansa e idea pa trese kambio mas lihé ku ta posibel. Tantu Steven Martina komo Marilyn Alcala Walle ta sospechoso na e momentunan aki. Den kaso di Steven Martina ta asina hasta ku OM mes a pone un kastigu kondishonal p’é mará na un tempu di prueba.
E kastigu kondishonal di Steven Martina ta vense den luna di mei, miéntras ku pa lokual ta trata Marilyn Alcala Walle e organisashon di PAR ta pendiente pa sa kiko ta bai sosodé, di akuerdo ku informashonnan risibí. Ta resultá ku for di gabinete Rhuggenaath a sali un komishon ku na e momentunan aki ta evualando e lei di screening, paso e pensamentu ta ku mester trese kambio den esaki, promé ku e elekshon ku tin di tuma lugá na 2021.
Segun informashonnan ku Vigilante ta disponé di dje ta asina ku e komishon aki ta trahando fuerte sperando ku nan lo por entregá e konsepto na Gabinete Rhuggenaath di moda ku nan ta manda esaki Raad van Advies pa despues someté den un reunion públiko den Parlamento, tal manera nos a trese pa dilanti ayera. Ya Vigilante a publiká ku e ta disponé di informashon ku tantu PAR komo MAN ta para pa trese kambionan den e lei di screening aki mas pronto ku ta posibel. Ayera nos a sostené kombersashon ku parlamentario Stephen Walroud kende ta un dje parlamentarionan mas kritiko ku ta forma parti dje frakshon di PAR den Parlamento. E no a basilá pa splika Vigilante ayera ku e ta para na fabor pa kambionan den e lei aki. El a bai asina leu na splika Vigilante ku interes general ta riba lei. Den e kaso aki e la hasta kue komo ehèmpel ku si e ta presidente di Fundashon Whoolahup, ku esaki no por strob’é di profilá komo mandatario pa pais si resultá mes ku e la lubidá na distansia su mes for di esaki, na momentu ku e la aseptá pa bira minister. Segun su deklarashonnan na Vigilante ta asina ku loke ku tin di ser apresiá ta ku un mandatario por tabata aktivo den diferente fundashon, kua a sirbi pa konstruí un karera ku al final ta pone den posishon pa sirbi su pais. Den un situashon asina e ta haña ku ta di lamentá ku pa un ekibokashon un mandatario asina tin ku baha, paso e la lubidá di distansia su mes.
P’e lokual ku ta pasando ta ku tin krítikonan ku a mira e buraku den e lei di screening, kua a trese kuné ku kehonan a ser entregá i ku awor Kòrsou ta den un situashon ku 2 minister mester a baha. Teniendo na kuenta ku tur e sirkunstansianan parlamentario Stephen Walroud a konfirmá na Vigilante ku e sigur ta para na fabor pa kambionan den lei di screening. E la hasta splika Vigilante ku por ta dura mitar aña òf un aña mes, pero ku e kambionan mester tuma lugá pa lokual ta trata e lei di screening.•