Polis ta haña kilo di fentanyl den Eindhoven

77
djis un tiki di fentanyl por ta mortal

EINDHOVEN—Den un schuur na Eindhoven polis a haña mas ku un kilo di e droga peligroso fentanyl.

Segun Ministerio Públiko ta prome biaha ku a konfiská un kantidat asina grandi di e supstansia peligroso aki. Fentanyl ta parse morfina den su funshonamentu pero ta hopi mas fuerte. E supstansia ta hopi adiktivo i un tiki kantidat mes por ta mortal. Den mundu di medisina ta hasi uso di fentanyl komo anestesia i pa dolor. Segun Omroep Brabant a haña e supstansia den saku di plèstik na kas di un hòmber (42). Inisialmente polis a kere ku ta kokaina tin den e saku pero investigashon a indiká ku ta fentanyl. Doño di e kas a keda detené. Banda di e supstansia peligroso polis a konfiská tambe oloshinan karu, míles di euro kèsh i armanan prohibí. Na Merka i China fentanyl ta un problema grandi pa basta tempu. Na Merka míles di hende ta muri di sobredosis pa aña, den supstansia ku ta den remedinan ku por kumpra online. Hopi di e remedinan ta prosedente di China ku entretantu a tuma medidanan i ta regulá eksportashon di remedinan pa dolor.