Treinen pa diferente organisashon pa identifiká, referí i protehá víktima di trafikashon di hende

62
Punda– Ministerio di Hustisia den persona di e koordinadó enkargá ku trafikashon di hende Sr. Norman Marchena huntu ku e representante di IOM UN Migration aki na Kòrsou a organisá dianan 27 i 28 yanüari último un treinen den kuadro di trafikashon di hende titulá “Identification, Referral and Protection of Victims of Human Trafficking”. Esaki a tuma lugá na Opleidinginstituut Rechtshandhaving en Veiligheidszorg (ORV).

Sra. Argentina Cruz tabata e representante di IOM Panamá ku a duna e 2 dia di treinen na e partisipantenan. Den e treinen a toká diferente tema manera e vulnerabilidat di situashon di migrantenan, elementonan den trafikashon di hende, e impakto di trafikashon di hende riba salú i bienestar di e víktima, identifikashon di un víktima, e forma di entrevistá un víktima di trafikashon di hende, protekshon i asistensia na e víktima. E treinen tabata interaktivo i a konsistí di diferente ehersisio kual na final e partisipantenan den grupo mester a hasi un presentashon. Na final di e seshon a diskutí tokante e konteksto di trafikashon di hende na Kòrsou kaminda a para ketu riba e manera di traha konhuntamente di forma interno den ministerio i eksterno ku otro ministerionan pa kompartí informashonnan nesesario pa por ehersé e trabou nesesario den rekonosé señalnan di trafikashon di hende i atendé ku víktima di trafikashon di hende.

Na e treinen aki a partisipá diferente organisashon manera Ministerio di Hustisia, Ministerio Públiko, Slachtofferhulp, Kuerpo Polisial Kòrsou, Toelatingsorganisatie, Ofisina pa Bienestar di Mucha, Ministerio di desaroyo sosial, Labor i Bienestar, Ministerio di Desaroyo Ekonómiko, Famia Plania i Stichting Zorg en Herstel. For di e dos dia di treinen nan aki a yega na un akuerdo ku den e lunanan ku ta sigui  i lo traha na un sistema di “manual den kua ta menshoná tur instansianan ku ta envolví ku e kasonan i un maneho kon ta referí un víktima na e instansia konserní nan. Pa yega na un struktura profeshonal a aserka IOM pa yuda den esaki. Tantu Ministerio di Hustisia i IOM por mira bèk riba  un treinen eksitoso pa konsientisá diferente organisashon ku tin di aber ku e tema di trafikashon di hende.