Despues di 154 viktoria konsekutivo…. E yudoka Teddy Riner a sufri su promé derota den 10 aña

29
Teddy Riner(drumi abou) a sufri su promé derota den kasi 10 aña.
PARIS – Pa un derota ta un notisia relevante, esaki sigur ta un detaye ku ta deskribí un gran deportista, ku semper a kustumbrá di ta viktorioso i ku su viktorianan a bira asta komun pa prensa general, i esaki ta e kaso tambe di e yudoka franses Teddy Riner.

E yudoka franses di un forsa brutu natural, ku un estatura di 2.03 meter, i un peso di 140 kilo, na edat di 30 aña ya ta e mihó yudoka  den historia di e deporte aki. Pero tabata djadumingu último, durante di e Grand Slam di yudo na Paris ku e yudoka hapones, Kokoro Kageura, di 24 aña di edat, a marka historia na momentu ku e la proporshoná, e yudoka Riner, su promé derota despues di 154 viktoria konsekutivo i kasi 10 aña di reinado inbatibel den e kategoria di peso pisá. Riner ta pendiente pa su partisipashon na weganan olímpiko di Tokyo, unda e ke logra konkista su di tres medaya di oro olímpiko konsekutivo.

“Si e lo a sosodé durante di e weganan olímpiko, lo mi a rabia pisá. Ta bon ku ta aworakí esaki a tuma lugá, mirando ku ainda falta sinku luna pa olimpiada. Mi ophetivo prinsipal, manera semper mi a komentá esaki, ta pa konkista e medaya di oro na Tokyo i asina forma parti un tiki mas di e historia di mi deporte. Mi ke agregá algu mas: mi ta sinti mi hopi aliviá for di e preshon di konta e peleanan pa asina logra alkansá e rèkòrt di Yasuhiro Yamashita, tabata un preshon enorme”, asina e leyenda di Yudo, Teddy Riner a komentá durante un rueda di prensa.