Despues di a kore esaki pa promé bia ayera na Silverstone…. Max verstappen hopi optimista ku e vehíkulo RB16

28
Max Verstappen den e RB16 riba e sirkuito di Silverstone ayera.
SILVERSTONE – Ayera e ekipo di Fórmula 1, Red Bull Racing, a presentá e RB16, kual lo ta e vehíkulo pa e temporada 2020. Esaki mester bira e vehíkulo ku kua e piloto hulandes Max Verstappen, lo tin e oportunidat pa bira e kampion mundial di mas yòn den historia di e deporte máksimo di outomobilismo.

Max Verstappen a kore e promé meternan ku e vehíkulo durante di un dia speshal pa filmashon aya riba e sirkuito di Silverstone. Durante e dia di filmashon e velosidat máksimo pèrmití ta di 100 kilometer pa ora. Di e forma aki tambe e ekipo di Red Bull por a logra akumulá algun informashon preliminar importante tòg, ku mira riba e dianan di prueba ku ta programá pa otro siman.

“E kareda di prueba a bai hopi bon”, asina Verstappen a komentá. “Naturalmente ta di gran importansia pa realisá un kareda di prueba di algun meter ku e vehíkulo nobo pa asina kontrolá si tur e piesanan ta funshonando manera mester ta, promé ku nos realisá e karedanan di prueba mes na Barcelona. Mi ta ansioso pa e dia aki yega pa kaba.”

Por a tuma nota di algun detaye nobo i den esaki e entrada di airu na e nanishi di e vehíkulo nobo tabata esun ku mas a resaltá.