Grand Prix di China kanselá debí na coronavírus

28
Grand Prix di China kanselá debí na coronavírus.
SHANGHAI – E Grand Prix di China di Fórmula 1, ku mester tuma lugá dia 19 di aprel próksimo na Shanghai, a keda kanselá. Debí na e brote di Coronavirus na Asia, no ta konsiderá responsabel ni sigur pa laga e kareda aki kontinuá.

Tantu FIA komo Fórmula 1 lo ta trahando riba un fecha nobo pa organisá esaki. Un kambio di sede pa e Grand Prix si ta parse di ta un mishon imposibel na e momentunan aki. Praktikamente no tin espasio disponibel tampoko riba e kalendario super yen di Fórmula 1 di e temporada aki.

Ta asina tambe ku anteriormente ya a kanselá e kareda di Fórmula E ku mester a tuma lugá riba e sirkuito di Sanya na China. Esaki tabata programá pa tuma lugá dia 21 di mart próksimo. Banda di e kareda di Fórmula E, a kanselá tambe e kampionato mundial di atletismo bou di dak.

Meskos a kanselá diferente enkuentro di futbòl na China, debí na e brote di coronavirus. Ainda no ta muchu kla si e Grand Prix di Vietnam tambe lo ser kanselá. Manera ta konosí, e pais aki ta pega na China i dia 5 di aprel próksimo lo ta plania pa organisá nan promé Grand Prix den historia di e pais.