Kartanan ku bòm ta eksplotá den Amsterdam i Kerkrade

123
polis ta investigando e eksploshonnan
AMSTERDAM—Na Kerkrade i Amsterdam dos karta-bòm a eksplotá ayera mainta segun outoridatnan.

Na Kerkrade esaki a tuma lugá alrededor di 8:30 den un kompania di pòst den Wiebachstraat. No tabatin heridonan. Ta trata di e kompania Ricoh segun De Limburger, ku ta spesialisá den digitalisashon di paketenan di pòst. No ta konosí si tin relashon ku e bòm ku a eksplotá na Amsterdam den un sentro di pòst di ABN Amro na Bolstoen. Esaki a tuma lugá prome ku 8’or, segun un bosero di e banko a konfirmá na RTL Nieuws. Tur hende ku tabata presente a keda den shòk. Polis lo sigui investigá e kaso. Komienso di yanüari un filial di ABN Amro na Maastricht a haña un karta di posiblemente e persona(nan) ku a manda diferente kartanan ku bòm pa kompanianan. No tabatin un eksplosivo den e envelòp pero si un karta segun polis. Fin di desèmber i komienso di yanüari diferente kompania a haña e kartanan aki. Ta trata di dos hotel, un pòmp gasolin i un sentro di pòst den Amsterdam, un makelaar na Utrecht i tres kompania den Rotterdam, inkluso un incassoburó. E eksplosivonan no a aktivá pero por a okashoná dañonan físiko severo. Polis ta tene kuenta ku tur karta ta di mesun hende i ta investigando tur senario, inkluso ekstorshon.