‘Mi ta sintimi hopi malu ora e dal mi pero mi ta pordon’é’

451
WILLEMSTAD,—  E hòmber Suwensly Lawender di 23 aña tabata dilanti wes pa un kaso unda lo e mester a choka i tambe menasá su propio mama. Wes a duna e mama di e sospechoso chèns di papia den korte, unda e mama a bisa ku e ta sintié hopi malu ora su propio yu ta maltrat’é, pero e ta pordon’é pa loke el a hasi. A buta e sospechoso na altura ku por mira bon kla ku su mama stim’é hopi ounke el a maltrat’é. Lawender na su turno a bisa di lo primintí ku nunka mas lo e kometé e echonan.

Tabata 18 di novèmber di aña 2018, ku e hòmber Suwensly lo mester a menasá su mama despues ku nan lo mester tabatin un diskushon. Despues e diskushon lo a inisiá entre e sospechoso ku su mama, lo e la bisé ku e ta kita su bida. Segun Ministerio Públiko ku e sospechoso a bisa su mama ku lo e tir’é den su kara. Tambe lo e la bisa su mama ku e tin hopi rabia riba dje pa tur e biaha nan ku e la lag’é kai será. Segun OM ku Suwensly a bisa  su mama ku e ta kita su bida i lag’é bai den shelu serka su tata.

E kaso tabata unu basta tristu unda por a nota ku e mama di e sospechoso tabata ke pa e bai kas. Tur esaki despues ku e sospechoso a bisa wes ku e kier rekobrá su libertat pa asina e por traha spar i kumpra un pasashi pa e por bai Hulanda. Segun Suwensly ku e kier bai Hulanda pa e por establesé su mes na e pais i tambe pa e por bai skol. El a bisa ku e kier bai serka su ruman i ku aki na Kòrsou no tin nada mas pe.

A konfrontá e sospechoso ku e echo ku lo ke pa e bai Brasami, kual el a bisa ku e no kier bai. Segun su deklarashon ku ya den pasado el a bai Brasami i ku esaki no a yud’é ku nada. El a sigui splika ku e tabata uza Molly pero e la stòp di uza esaki di su mes. Mas aleu el a bisa wes ku meskos ku e la stòp di uza Molly e por stòp di uza mariwana tambe. Pa loke ta trata e akusashon di maltrato di 19 novèmber 2019, e la splika ku tur kos a kuminsá dor ku e tabata den un grupo di zwartepiet i ora e la yega kas el a nota ku su mama lo a benta su legging afó.

Tabata aki segun su deklarashon ku e diskushon a eskalá mirando ku e tabata ke pa su mama kumpra e legging. Segun su deklarashon ku en bèrdat el a kue su mama choka pero e no a kue choka duru. Suwensly a bisa den korte ayera ku e ta bebiendo su remedi nan den SDKK i no ta hasi uzo di droga. A pidi pa e sinta 135 dia di prizòn i tambe pa e keda ku 230 dia kondishonal ku 3 aña di prueba kologá riba su kabes. Tambe a pidi pa e bai Brasami pa e por haña yudansa pa ku su adikshon.

Wes a bisa ku e ta haña straño kon bin no a traha un rapòrt di sikólogo ni tampoko di sikiater di e sospechoso. El a bisa ku netamente pa esaki e ke pa posponé e kaso, pa traha e rapòrt nan pa sa kiko mas por ta bayendo robes. E kaso lo sigui 1 di yüni benidero.