Minister no a tuma ningun akshon konkreto pa pone esnan ku a kousa e pèrdida den Giro Bank responsabel

356
Señor Cooper ta bisa ku ta inkreibel ku Minister Gijsbertha kier introdusí un ABB plùs, kaminda Minister ta bai pone pueblo di Kòrsou, ku no ta responsabel pa loke a pasa den Giro Bank.
Willemstad,– Parlamentario pa partido MFK señor Charles Cooper, a splika Vigilante ku el a manda un karta pa pidi minister d finansa klaridat riba e introdukshon di ABB plùs i e fondo di garantia pa bankonan.

Señor Cooper a bisa Vigilante ku el a tuma nota ku ta e intenshon di gabinete Rhuggenaath pa oumentá e tarifanan ku originalmente a wòrdu anunsiá ku introdukshon di ABB, ku un porsentahe pa asina por kubri e pèrdida registrá den e debakel di Giro Bank. Tambe Minister di finansa a anunsiá ku lo bai introdusí un fondo di garantia ku bankonan lokal mester bai depositá un sierto suma den e fondo aki.

E ta sigui bisa ku ta na masha hopi okashon por a skucha Minister Gijsbertha deklará den prensa, ku gabinete Rhuggenaath lo no bin ku medidanan fiskal, debí ku pueblo di Kòrsou no tin mas espasio finansiero pa karga kualkier medida fiskal, pero ku introdukshon di ABB plùs, Minister ta hasi nèt kontrali di loke Minister mes a prediká, esta ku pueblo di Kòrsou no tin forsa finansiero pa karga medida fiskal i awor Minister ta oumentá e tarifa di ABB.

E parlamentario ta bisa ku durante reunion den Parlamento riba e debakel di Giro Bank, Minister Gijsbertha a bisa eksplísitamente ku su persona no por wòrdu pone responsabel pa e maneho desastroso ku a hiba na Giro Bank i ku a kondusí na pèrdida di 776 mion florin, siendo ku Minister ta esun responsabel pa ehekushon di lei di “Bankwezen”.

Señor Cooper ta bisa ku ta inkreibel ku Minister Gijsbertha kier introdusí un ABB plùs, kaminda Minister ta bai pone pueblo di Kòrsou, ku no ta responsabel pa loke a pasa den Giro Bank pa medio di un medida fiskal paga pa e pèrdida di 776 mion di Giro Bank. Pero Minister Gijsbertha si no ta responsabel.

E ta splika tambe ku te awe Minister no a tuma ningun akshon konkreto pa pone esnan ku a kousa e pèrdida den Giro Bank responsabel pa nan aktonan. Minister ta skonde tras di un supuesto investigashon pa protehé kompinchinan polítiko i direktornan di CBCS pa no pone nan responsabel pa e loke a pasa den Giro Bank.

Cooper ta bisa ku manera ya indiká pa frakshon di MFK introdukshon di ABB plùs ta un medida inhustu, kaminda ta pone pueblo di Kòrsou den su totalidat responsabel pa paga algu ku nan no tin arte ni parte den dje. Miéntras ku esnan responsabel mes Minister no ta tuma ningun akshon kontra di nan, pa manda un mensahe bon kla ku loke a pasa na Giro Bank ta algu inakseptabel.