Nan ke logra klasifiká na Arizona…. Igor González tin miedu di bai Taiwán pa e coronavírus

27
Igor González lo hasi tur su posibel pa Puerto Rico klasifiká na Arizona.
PUERTO RICO – E dirigente Juan “Igor” González ke hasi tur loke ta na su alkanse pa logra ku e selekshon di beisbòl di Puerto Rico ta klasifiká den luna di mart próksimo pa weganan olímpiko.

Ta asina ku den luna di mart, di 22 pa 27 pa ta mas eksakto, e selekshon borikua lo partisipá den e torneo klasifikatorio ku lo tuma lugá na Arizona i ke trata na evitá asina ku e ekipo lo mester biaha pa Taiwan pa aya hunga un enkuentro di repechahe na luna di aprel, ku temor pa e brote di coronavírùs.

“Debí na e sirkunstansianan ku ta okuriendo ayanan, nos meta ta pa gana aki mirando ku e situashon di coronavirus no ta nada fásil. Taiwán ta situá algu mas abou, pero no ta nada fásil. Ban wak kiko lo pasa”, asina Igor González a ekspresá den un entrevista, durante ku e selekshon tabata trein den e stadion Moisés García na Guaynabo.

Di 22 pa 27 di mart próksimo Puerto Rico lo partisipá den e torneo pre olímpiko di Amérika. E selekshon di Puerto Rico ta den e grupo A huntu ku Merka, Nicaragua i República Dominicana. E grupo B lo ser integrá pa Canada, Cuba, Venezuela i Colombia. E mihó dos ekiponan di kada grupo ta avansá pa un super buèlta.

E ekipo ku finalisá na promé lugá lo klasifiká dirèkt pa weganan olímpiko Tokyo 2020. E ekiponan ku finalisá na di dos i di tres lugá lo tin un último oportunidat pa buska nan klasifikashon di 1 pa 5 di aprel próksimo na Taiwan.