Riba keho entregá kontra su persona: Zita Leito ta bisa pa laga OM hasi su trabou

364
Pa loke ta e asuntu di ku e ta pertenesé na grupo kriminal, Minister Jesus Leito a bisa ku tur hende ku konosé sa hopi bon ku e no ta den e kosnan ei i ku e no ta pertenesé na niun grupo kriminal.
Willemstad,– Minister di VVRP señora Zita Jesus Leito a splika prensa ayera el a tuma nota di e keho ku Norwin Ferrero a duna kontra su persona, pero e ta warda riba ministerio públiko pa atendé e keho.

Zita ta bisa ku el a tuma nota di esaki den prensa i el a tuma nota tambe di e diferente puntonan ku a keda trese dilanti i ta OM lo mester husga si ta puntonan ku mester pèrsigui minister si òf nò, pero e ta mira si ku tin dos punto, unu ku ta andando for di masha hopi aña pasa kaminda un persona a laga un tereno pa herederonan, kaminda katibunan a bira heredero i ku e persona aki, esta esun ku a hasi e denunsia,  ta un di e hendenan ku su nòmber ta aparesé komo heredero di un di e katibunan. Minister ta bisa ku ta un kaso ku ta andando masha hopi tempu i ta un kaso ku e hende ku a entrega e denunsia ta un di esnan ku ta lucha hopi tempu kaba pa sa ken ta doño di e tereno.

Pa loke ta e tereno di Wechi esaki minister ta bisa ku ta algu ku gobièrnu a kumpra i HOF a duna veredikto ku FKP por kuminsá traha riba e tereno.

E ta bisa ku na momentu ku tin algu di mes minister di VVRP ta responsabel, pero terenonan “eigendom”  si ta doñonan mester atendé ku nan asuntunan.

Pa loke ta e asuntu di ku e ta pertenesé na grupo kriminal, Minister a bisa ku tur hende ku konosé sa hopi bon ku e no ta den e kosnan ei i ku e no ta pertenesé na niun grupo kriminal.

“E kos aki ta trata di pèrmitnan di konstrukshon di 2016 i mi no tabata minister di VVRP e tempu ei, pues mi ta bisa pa laga OM hasi su trabou”, asina minister Zita Jesus Leito a bisa. E ta bisa ku ta kosnan di hopi tempu i ku no a keda bon reglá den pasado. E ta kere ku manera el a bisa, el a tuma nota den prensa di e keho i p’esei e ta laga e kaso kana, pero si e ta bisa ku e parti di pertenesé na grupo kriminal, no ta kuadra ku nada nada di bèrdat i esei si e kier kita mesora for di mesa.

Pa loke ta e tereno di Wechi, minister Jesus Leito a bisa ku desèmber a bini e veredikto ku FKP por kuminsá traha kas despues ku nan tin pèrmit for di 25 aña pasa.