8 aña pa violashon di algun damita

69
víktimanan ta pidi daño perhuisio
ZAANDAM—Ministerio Públiko ta eksigí 8 aña kastigu i tratamentu sikiátriko obligatorio pa e sospechoso (24) di Zaandam.

E sospechoso a viola diferente damitanan hóben. Boyd W tabata buska kontakto ku damitanan den edatnan di 13 pa 16 aña via internet. E tabata pidi nan foto despues di haña nan konfiansa. Despues e tabata pidi nan video ku sierto imagennan òf nan mester tene relashon kune sino e ta publiká nan fotonan komprometedora. Segun OM e sospechoso a violá, menasá i malusá e damitanan di forma repugnante. E tabata gaña e damitanan ku e tin kanser terminal i pa e motibu aki e tabata pidi fotonan. E sospechoso a deklará den korte ku e ta lamentá su aktonan i ku ta prinsipalmente atenshon e tabata buska. E sospechoso a keda detené den 2018 despues ku un damita di 15 aña a hasi denunsia di violashon. For di investigashon a resultá ku posiblemente el a violá mas damitanan entre 2017 pa 2018. Diferente víktima a deklará kontra dje den korte. Tambe nan mayornan a testifiká. Nan ta pidi tambe daño perhuisio.