C-Stars United vs Haitian Union Klup kaba den bululú formal

162
WILLEMSTAD—E partido di futbòl bálido pa e di 3 divishon di futbòl FFK, unda C-Stars United i Haitian Union Klup a enfrentá otro na SDK, a kaba den un bululú formal ayera nochi. Un ke otro unda ku rèfri di e wega, a saka alrededor di 10 karchi kòrá, despues di e tángana ku a surgi riba tereno di wega.

Tabata na momentu ku un i tur tabata sperando e pitaso final, ku a surgi un hugada unda ku atakante a dal den kiper i rèfri a pita pa infrakshon. Kiper no muchu kontentu a reklamá e hungadó kontrali unda a inisiá un diskushon, pa bira un interkambio i eskalá den un pelea formal.

Tabata aki ku bankinan a bira bashí i demas hungadónan riba tereno tambe a bai mete den e problema, ku a bai kompletamente for di man i a bira un bataya kampal riba tereno, ku miembronan di e 2 ekiponan gòlpiando otro.

Durante di e pelea(nan) aki, un miembro di C-Stars a resultá na suela i a haña skòp i sla formal na kabes, ku a pone ku seguidamente e la bin sak den otro i tabata arohá bastante i mester a keda transportá ku urgensia ku ambulans pa CMC.

Debí na e insidente aki, rèfri a pita pa final i lo traha su rapòrt di e suseso, pa asina por yega na medidanan disiplinario, kontra di esnan ku tabata enbolbí.

Un bista mahos, kon futbolista i dirigentenan tabata tira moketa i skòp riba otro, riba tereno di futbòl, unda C-Stars tabata den bentaha mínimo, faltando algun sekònde pa final.