Corendon i KLM a firma akuerdo pa kasi un kuart mion stul

964

WILLEMSTAD,– Ayera e kompanianan Corendon i KLM a firma un akuerdo ku ta bisa kuminsando e próksimo temporada di “winter” i durante tres aña, kasi un kuart mion stul lo ser reservá pa vuelonan pa Kòrsou. Asina Luchtvaartnieuws.nl a anunsiá ayera.

Ku esaki e organisashon di fakansi (Corendon) ta sigurá di tin sufisiente kapasidat pa e kantidat di turistanan kual ta kresiendo i ku kier bini e islanan ABC .

Den próksimo añanan Corendon lo amplia nan aktividatnan na Kòrsou i dia 1 di aprel próksimo nan lo habri e hotèl nobo Corendon Mangrove Beach Resort aki na Kòrsou.

E hotèl all-inclusive di 5 strea aki lo konta na apertura ku un total di 380 kamber, pero despues lo keda ampliá te ku 850 kamber den 2021.

Na momentu ku esaki tuma lugá, mesora e ta bira tambe e hotèl di mas grandi aki na Kòrsou. Pa motibu di e akuerdo di traha huntu aki, KLM lo kier amplia su vuelonan pa Kòrsou den tèrmino i hasi nan dòbel di lokual na ta aworakí pa dia.

Un fecha konkreto pa esaki, no a keda pone ainda, asina KLM mes a bisa ayera durante di e firmamentu di e akuerdo.

Ta dependé ainda di algun faktor, manera entre otro e kresementu di turismo i e kantidat di kambernan disponibel.