Investigashon penal pa iregularidatnan servisio Belasting

57
posiblemente minister Hoekstra lo laga hasi investigashon
DEN HAAG—Mester bini un investigashon penal riba iregularidatnan kometé pa empleadonan di servisio di Belasting den kaso di ‘toeslag’.

Minister Hoekstra (Finansas) i e sekretarionan di estado nobo Vijlbrief i Van Uffelen mester tuma e inisiativa pa e investigashon. Esaki ta e yamada di Frank Herreveld, abogado i konsehero fiskal. Herreveld ta afiliá tambe na Orden di Konsehronan fiskal. E ta atvertí ku e kaso no mester bai den olvido (doofpot). Segun e fiskalista ta parse ku politikonan ta skonde pa no duna kontesta si e empleadonan públiko a hasi nan mes kulpabel di iregularidatnan. Tin sufisiente indikashonnan pa un investigashon penal. Pa e motibu aki un investigashon independiente ta nesesario riba e aktonan ilegal bou di mando di Ministerio Públiko. E fiskalista ta rekonosé ku ta un asuntu difísil, p’esei mes mester hasi investigashon. Transparensia riba e resultadonan ta nesesario. Den su análisis e fiskalista ta konkluí ku tin basenan huridiko pa tende ku gerensia di departamentu Toeslagen i ministerio di Finansa. Importante ta ku konsientemente nan a stòp e kompensashonnan, siendo nan tabata sa ku den 20% di kaso esaki tabata inkorekto. Esaki ta indiká ku nan a aktua intenshonalmente ku ta un kondishon importante pa proba un iregularidat. E mandatarionan no tabata na altura pero si por kuestioná nan pa negligensia, ora nan a tende di e problemanan. Minister Hoekstra a bisa den yanüari ku no tabatin iregularidatnan pero ku e ta permití un investigashon komo ‘second opinion’. OM mester disidí ainda riba e denunsianan ku tin kontra servisio di Belasting pa entre otro abusu di poder i tratamentu ilegal.