Lio Plantijn ta puntra: Ki dia lei di seguridat i protekshon den enseñansa ta keda kla

171
Señor Plantijn ta bisa ku te awe na 2020 parlamentu no a konkretá e proyekto di lei aki pa e bira lei ku ta bira un garantia pa trankilidat i sentido di seguridat reina den nos skolnan.        .

Willemstad,– Direktiva di SITEK, segun señor Darius “Lio” Plantijn ta lamentá insidentenan bou di hóbennan na skol.
Den mesun rosea direktiva di SITEK ta lamentá ku tin víktimanan a kai ku asta mester a ser hospitalisá. E insidentenan aki ta lanta hopi emoshon serka famia, den skol i den komunidat. Den tur e emoshonnan aki, hopi a lubidá ku ta for di komienso di aña 2014 direktiva di SITEK a entregá un proyekto di lei na tantu Konseho di minister di e tempu ei komo Parlamentu di e tempu ei. Un proyekto di lei pa garantisá seguridat i protekshon den skol, den instansianan di edukashon i den bùsnan ku ta transportá nos muchanan di skol. Ta trata un proyekto di lei ku  ta kondená asuntunan manera tentamentu, agreshon ku òf sin arma, poseshon di kalke tipo di arma, poseshon di droga, hòrtamentu etc.
Señor Plantijn ta bisa ku te awe na 2020 parlamentu no a konkretá e proyekto di lei aki pa e bira lei ku ta bira un garantia pa trankilidat i sentido di seguridat reina den nos skolnan.
E ta bisa ku den e diskushonnan rondó di e insidentenan bou di hóbennan na skol, nos ta mira ku ta purba tilda trahadónan di skol di no tabata sufisiente atento. SITEK ta desaprobá esaki. Segun señor Plantijn, aki ta trata skolnan avansá, e muchanan mester tin sierto grado di noshon i komportashon kiko ta bon i kiko ta malu. Ademas ta algu nobo e wega aki tabata. Niun hende no tabata na altura di dje. Banda di esei trahadó den skol no tin nada na su disposishon pa disipliná nos muchanan mas. Pió ainda ki ora un trahadó atendé ku un mucha e por hañ’é ku mayor, ku grupo, ku funshonario, ku polis pa atendé kuné. Ta bin aserka ku e trahadó den skol mes ta yen di strès, demotivá i tin falta di rekonosementu, falta di balorashon i falta di insentivo. Plantijn ta sigui bisa ku dia 12 di febrüari a kumpli nèt ku 1 aña ku SITEK i trahadónan den wèlga di 10 dia a posponé e wèlga. Te dia di awe nan no a risibí niun insentivo. Ta di spera ku awor e insidentenan lamentabel a tuma lugá ku Parlamentu ta kaba di trata e proyekto di lei di seguridat i protekshon den skol, den instansianan di edukashon i pa nos shofùrnan ku ta transportá nos muchanan di skol, pa kaba, presidente di SITEK a terminá.