Minister di VVRP: Den 2020 lo atendé ku ilegalidat riba Klein Kòrsou

758
Minister di VVRP señora Zita Jesus Leito a bisa ku si tin kosnan robes riba Klein Kòrsou, lo mester pone hende responsabel.
Willemstad,– Minister Zita Jesus Leito a bisa medionan di komunikashon ku el a tuma nota ku tin trabounan di konstrukshon ta tumando lugá na Klein Kòrsou.

E ta bisa ku huntu su persona i minister di GMN tambe a tuma nota, paso nan tin un komishon ku a keda instituí kaminda ku e komishon lo mester bai traha einan, esta na Klein Kòrsou.

“Pronto e komishon aki lo bai haña su kontenido pa atendé ku e área aki ku ta un área protehá”, asina e minister a duna di konosé. “Pues tin hopi trabou pa bai hasi einan i e ta den plan i ta bai kuminsá hasi trámitenan pa e komishon por kuminsá traha”.

Minister ta bisa ku den aña 2020, sigur lo bai atendé ku e parti aki, esta esun di Klein Kòrsou. “Si tin kosnan robes lo mester pone hende responsabel, pero en todo kaso ta atendiendo e parti aki pa kuminsá ku e trabounan na Klein Kòrsou, ta hopi kos ta ilegal ei riba i mester atendé di manera struktura pa atendé ku kosnan ku a bai robes pa hopi aña”, segun minister di VVRP señora Zita Jesus Leito. E ta bisa ku aña pasa den reunion di parlamento, hopi kos a sali na kla, kaminda a señalá hopi kosnan ilegal riba Klein Kòrsou i pues ta bai kuminsá atendé esakinan.