Real Rincon a kibra invikto di Uruguay

182
Real Rincon.
KRALENDIJK—Futbòl a kontinuá na nos isla ruman Boneiru tambe. Esaki na momentu ku 2 ekipo invikto a enfrentá otro. Ta trata di e ekipo kampion di kampionato tras di lomba, Real Rincon, ku a enfrentá e ekipo di Uruguay.

Un ke otro den wega ku a mira akshon riba tereno di stadion Antonio Trinidat na Rincon. E partido a finalisá ku skor di 2-0 pa e ekipo di Real Rincon. Na di 17 minüt di e parti inisial, Lacey Pauletta ta habri anotashon, pa seguidamente faltando 3 minüt pa sosiegu Fabio Hierck, ku un tremendo tiru for di un tiru liber, amplia e bentaha na 2-0, kual a bira tambe e skor final di e partido.

Real Rincon ta keda ku awor komo úniko ekipo invikto i komo lider den aktual kampionato na Boneiru, den wega ku a kibra rèkòrt di asistensia pa e kampionato aki. E ekipo di Rincon tin 25 punto for di 9 wega, miéntras ku Uruguay a keda ku 20 na di 2 puesto, tambe for di 9 wega, unda demas ekiponan a hunga 8 wega te awor.