Durante Grand Slam na Düsseldorf…. Roy Meyer ta keda kòrtiku di logra medaya di bròns

154
Roy Meyer enfrentando e aleman Johannes Frey.
DÜSSELDORF – E yudoka di desendensia kurasoleño, Roy Meyer, durante di e Grand Slam di Düsseldorf a keda nèt kòrtiku pa logra medaya. Tabata djasabra último, den e pelea pa medaya di bròns, ku e Yudoka di kategoria riba 100 kilo ta kai vensí kontra di e Surkoreano Min-jong Kim.

Meyer a start e torneo di forma kontundente ganando di su rival di Bosnia,  Harun Sadikovic, pa seguidamente ta gana tambe di e yudoka spañó Irinel Chelaru Grigoras i e yudoka polako Maciej Sarnacki.

Den e semi final e aleman Johannes Frey tabata mas fuerte ku Meyer i seguidamente e ta kai vensí tambe kontra di e sur koreano Kim. Roy Meyer aktualmente ta den un lucha fuerte ku e yudoka hulandes Henk Grol pa wak ken ta esun ku lo gana e puesto pa kompetí den weganan olímpiko di Tokyo 2020.

Grol durante di e Grand Slam na Düsseldorf a sali pèrdè for di su promé pelea. E meskos ku Meyer a keda kòrtiku kontra di e aleman Frey, ku finalmente a logra optené medaya di plata.