Kampionato mundial di pinpòn tambe a keda suspendé debí na brote di ‘coronavirus’

135
Kampionato mundial di pinpòn tambe ta keda suspendé temporalmente.
SUR KOREA – Un biaha mas otro evento deportivo na nivel mundial ta keda kanselá debí na e brote di e tan menshoná ‘coronavírus’. Na e okashon aki tabata e federashon internashonal di tènis di mesa(pinpòn), ITTF, ku a disidí di kanselá e kampionato mundial pa ekipo, ku mester a tuma lugá na luna di mart próksimo den e siudat Busan na Sur Korea.

Tur kos ta indiká ku probablemente e evento aki lo keda aplasá pa fin di luna di uni segun e propio ITTF a indiká. Sur Korea ta un di e paisnan unda ku e ‘coronavírus’ ta asotando mas pisa aktualmente. Entre tantu ya tin un total di shete persona ku a fayesé i kasi 900 hende ku ta infektá ku ‘coronavírus’.

Hulanda tambe tabata pendiente pa manda su ekipo maskulino i tambe su ekipo femenino pa e siudat di Busam. E ekipo femenino a klasifiká pa e torneo prinsipal miéntras ku e ekipo maskulino lo a kompetí den e di dos kategoria.

“Konsiderando e inseguridat i e kambio drástiko di e situashon na Sur Korea relashoná ku e brote di e vírus, a tuma e desishon aki na bienestar i komo protekshon pa tantu e hungadónan, ofisialnan i tambe e fanátikonan”, segun ITTF a indiká.