Karedanan di prueba di F1 a kontinuá na Barcelona….Max Verstappen lo ta aktivo durante tur e 3 dianan di prueba aki

156
E di dos periodo di karedanan di prueba den F1 ta kontinuá awe.
BARCELONA – Siman pasá e karedanan di prueba pa Formulá 1 a kuminsá ku 3 dia di prueba (djárason, djaweps i djabièrnè) riba e sirkuito na Catalonia i esaki lo kontinuá awe ku e di dos seri di 3 dia di karedanan di prueba ku lo dura te ku djabièrnè próksimo.E piloto hulandes, Max Verstappen, lo ta aktivo durante tur e tres dianan aki, preparando asina pa e temporada di Fórmula 1 ku lo ranka sali dia 15 di mart próksimo.

Max Verstappen lo interkambiá durante e karedanan di prueba ku su kolega di ekipo Alexander Albon. Durante e tres dianan aki nos lo bai mira enbèrdat kiko kada vehíkulo di e respektivo ekiponan tin aden.

E ekipo di Red Bull por ehèmpel tabatin un tremendo prestashon siman pasá i tabata e ekipo ku mas kilometer a rekoré durante e tres promé dianan di prueba, pero sin pone e mihó tempunan.

En kambio e ekipo di Mercedes si a pone e mihó tempu den nòmber di Bottas i nan tambe a kore un kantidat enorme di kilometer. E ekipo kampion mundial a bira tópiko di siman ku nan introdushon di e DAS, ku ta un sistema inovativo di stürwil.

Verstappen lo ta aktivo awe den oranan di mèrdia miéntras ku Albon lo ta aktivo den oranan di mainta. Pa loke ta mañan, djaweps, e órden di aparishon ta bòltu miéntras ku djabièrnè Verstappen lo sera e sekshon di entrenamentu pa e ekipo di Red Bull.

Seguidamente e ekiponan di fórmula 1 lo ta riba pista atrobe riba djabièrnè 13 di mart, ora ku nan lo ta preparando pa e Grand Prix di Australia ku lo tuma lugá na e siudat di Melbourne. E promé kareda di temporada 2020 lo ta dia15 di mart próksimo.