Retirando tur tres batido den di 2 inen…. Kenley Jansen kontentu ku su prestashon kontra Chicago Cubs

153
Kenley Jansen durante su entrevista despues di wega djadumingu.
GLENDALE – E ekipo Los Angeles Dodgers a enfrentá e ekipo di Chicago Cubs djadumingu último den Camelback Ranch na Glendale i a logra un viktoria ku skor di 4-2 pa asina pone nan rèkòrt na 2-0 durante e ‘spring training’ ku a ranka sali den fin di siman tras di lomba.

Tabata e picher Alex Wood ku a realisá su promé salida di ‘spring training’, ponchando dos batido den un inen di labor. E picher lenks a keda kambiá despues di un inen di labor habriendo espasio asina pa e picher YDK Kenley Jansen drenta den wega.

Esaki tabata Kenley su promé aparishon riba montikulo atrobe despues di a hasi esaki pa último bia den e di 5 wega di e ‘2019 National League Division Series’. Kenley a retirá tur tres batido ku e la enfrentá, ponchando dos di nan miéntras ku e la demostrá un tremendo velosidat i kontrol di su picheonan.

Su lansamentunan a keda rondia entre 92-93 mph durante su aktuashon djadumingu último, lusiendo asina un Kenley muchu mas sólido i konsistente kompará ku su promé aktuashon durante spring training di e temporada tras di lomba.

Buskando na evitá su start lento ku a torment’é na 2019, Jansen lo ta muchu mas agresivo durante su programa di lansamentu promé ku e dia di apertura. “Úniko kos ta ku mi tin ku logra hasi mi trabou”, Kenley a splika.

“Mi sa ken mi ta. Mi tin ku mehorá ainda. Nos tur sa esaki. Mi a sinti mi bon di por tabata eifó atrobe i di logra hasi e trabou”. Jansen a lusi un gran dominio riba su lansamentunan, kual tabata su enfoke tambe durante e temporada morto trahando ku Driveline Baseball.

“Definitivamente mi ta hopi kontentu di por a mira kuantu libertat mi tabatin despues di laga e bala bai”, asina Kenley a sigui komentá. “Bayendo den un direkshon, ku tur e ehersisionan ku nan a pone mi hasi, ta dunando su frutanan. Ta un satisfakshon enorme di por wak mi kurpa i mi brasa bayendo den e direkshon korekto”.

Despues di su temporada di mas malu estadistikamente mirá komo hungadó, Kenley ta konvensí ku e éksito optené di forma trempan lo krea un mihó base pa e konfiansa den futuro. “Sigur Sigur”, asina Kenley a reakshoná.

“Kada bia ku bo tin un tremendo salida ta importante. No ta importá mi si ta weganan di spring training òf no. Esaki tabata un gran salida pa kuminsá i pa sigui konstruí riba e futuro”.