Andrelton Simmons a baha di peso pa redusí strès riba su ènkelnan

153
Adrelton Simmons a baha di peso pa redusí strès riba su ènkelnan.
TEMPE – E shòrt stòp YDK, Andrelton Simmons, ta kompletamente enfoká  riba su kondishon físiko i su meta prinsipal ku esaki ta pa e rekuperá su abilidatnan kustumbrá bèk den e temporada 2020. E shòrt stòp di e ekipo Los Angeles Angels a deklará na prinsipio di e siman aki ku e la baha di peso ku e meta pa redusí strès riba su ènkelnan, sigur despues di a sufri dos leshon separá di esakinan durante e temporada 2019.

“Definitivamente e leshonnan aki a afektá’mi,” Asina Simmons a komentá na prensa. “Bo tin ku siña pa kon hunga na un nivel poko mas limitá. Mi tabata oké … Probablemente mi a pèrdè e momentùm ku mi tabatin, e ritmo i tambe e ‘timing’. Mi no por a ekstendé e hitnan den doblete. Mi por a move, pero no ku e mesun velosidat.” Asina Andrelton a sigui indiká.

“Mi ta kere den mi mes,” asina e kuater bia ganadó di wante di oro a agregá. “Mi sa ku mi tin e abilidat di por hasi hopi pa algun aña mas, i ademas ainda mi ta mehorando komo batido. Apesar ku esaki no tabata remarkabel durante di e último temporada debí na diferente faktor, mi sa ku ainda mi ta mehorando komo un batido i ta kresiendo komo un batido.” Asina e shòrt stòp YDK, Andrelton Simmons a finalisá.

Sigur e echo ku Andrelton ya tin 30 aña di edat i basá riba e problemanan di ènkel, e desishon pa mehorá su kondishon físiko ta unu sumamente inteligente  di su parti. Esaki lo ta tambe Andrelton su último aña di e akuerdo ku e ekipo Los Angeles Angels.