Batiendo komo DH i bayendo di 3-1 djamars…. Sherten Apostel basta aktivo ku e ekipo di Texas Rangers

157
Sherten Apostel basta aktivo ku Texas Rangers.
SURPRISE – E hóben pelotero Sherten Apostel, ku na novèmber último e ekipo di Texas Rangers a kumpra su akuerdo for di e ekipo Down East Wood Ducks, ta basta aktivo ku e ekipo di Rangers durante e periodo di ‘spring training’ aki.

Djamars último e hóben pelotero YDK, Sherten Apostel, a mira akshon den e enkuentro unda e ekipo di Texas Rangers a risibí bishita di e ekipo Kansas City Royals den e kompleho di ‘spring training’, Surprise Stadium, situá na Suprise, Arizona. Den e enkuentro aki e tersera base Sherten Apostel a mira akshon komo DH i a bati komo séptimo bate.

Sherten den su promé turno ta bati un flai pa sènter, den su di dos e la bati un roletaso pa tersera i den su di tres turno e ta konektá un doblete pa rait. Den bòm di nuebe e ta ser remplasá pa e pelotero Josh Jung.

Esaki tabata e di dos enkuentro ku Sherten a mira akshon den dje despues ku djaluna último tambe e la mira akshon den e enkuentro kontra Cincinnati Reds i a hunga na tersera batiendo komo séptimo bate tambe i bayendo di 2-0.

Ayera tambe Sherten Apostel a mira akshon durante e enkuentro ku e ekipo di Texas a enfrentá e ekipo di Colorado Rockies. Ayera Sherten a hunga na tersera i un biaha mas e tabata komo séptimo bate. Sherten a bai di 2-0 ku 1 kareda empuha.