Curt Smith konsiderá un di e hungadónan mas konsistente

217
Esaki lo ta Curt Smith su di 8 temporada ku Lincoln Saldogs.
LINCOLN – E ekipo di beisbòl, Lincoln Saltdogs, ekipo ku ta militá den e liga profeshonal independiente di beisbòl (Asosiashon Amerikano) na Merka, a bolbe firma e pelotero veterano YDK Curt Smith, pa loke lo ta su di ocho temporada (un rèkòrt di frankisia) ku e ekipo.

Curt Smith, di 33 aña di edat, for di aña 2011 a djòin e ekipo di Salt Dogs, bulando únikamente e temporadanan 2012 i 2014, temporadanan ku e la militá den e nivel dòbel A. “Nos ta sumamente kontentu di por konta ku e servisionan di Curt i ku e ta bèk serka nos durante e temporada 2020 tambe”, asina e presidente / gerente general di Saltdogs, Charlie Meyer, a komentá.

“E ta bolbe bèk despues di un temporada konsistente na Lincoln i ta un di e hungadónan mas konfiabel di e Asosiashon Amerikano. Nos ta sumamente fortuná di por tin Curt bèk i pa asina konstruí e ekipo pa e temporada aki “.

Curt Smith a hunga un total di 578 wega te ku e temporada tras di lomba ku e ekipo di Saltdog i tin un liña ofensivo di .314 / .380 / .465 / .880 den shete temporada. Smith ta entre e lidernan di frankisia di tur tempu ku 701 hit konektá (2º), 340 kareda anotá (2º), 130 doblete konektá (3º), 86 homerun konektá (2º), 390 kareda empuhá (2º) i 224 base por bola risibí (1º).

Smith aktualmente tin mester di apénas 22 wega mas pa asina kombertí su mes den e di dos hungadó den historia di e frankisia (Bryan Warner, 2001-2007) pa alkansá e kantidat di 600 wega di su karera i ta djòin tambe un total di 30 hungadó ku lo surpasá e marka di frankisia di Warner ku ta di 607.

Curt Smith durante su karera profeshonal, na nivel di dòbel A, a militá den tres diferente organisashon di liga grandi (STL, MIA, MIN).