Nos selekshon U-13 a regresá sin hunga na Aruba

69
Selekshon U-13 siman pasá na Aruba.
WILLEMSTAD—Tabata djabièrnè siman pasá, dia 13 mart 2020, den oranan trempan di mainta ku e delegashon lokal di futbòl, ku ta konta ku nos selekshon U-13, a biaha pa Aruba pa e tradishonal torneo Himno i Bandera.

Ta trata di torneo anual ku ta hunga na e isla, relashoná ku selebrashon di e isla riba fecha 18 mart, ku tan an fecha di dia di Himno i Bandera.

Sinembargo tabata despues di e yegada di nos muchanan ku a bira konosí, ku e torneo lo kontinuá, debí na medidanan ku a tuma relashoná ku desaroyo di ‘Coronavirus’ na e isla i tambe otro partinan di mundu.

Esaki a pone ku mester a regresá kas, unda e ekipo lokal a hasi esaki riba 3 diferente buelo, repartí den 2 djadumingu I finalmente e últimonan a regresá Kòrsou djaluna último.

Komunikado FFK

Relashoná ku esaki, tabata ayera ku FFK den un komunikado emití den oranan di atardi, a partisipá parti di e informashon aki, di e siguiente manera:

“Mi ke avisá ku nos selekshon nashonal U-13 ku a sali pa Aruba djabièrnè siman pasa pa kompetí den e torneo Aruba Himno i Bandera, a regresá Kòrsou den komienso di siman mirando e desaroyo di e vírus aki na Aruba i rònt mundu.

Tur nos hungadónan i e staf a regresá i ta sano i salvo serka nan famianan.

Den e ‘attachment’ por tuma nota di algun potrèt na Aruba durante nan estadia.

Sperando ku via di boso nos lo por kompartí tur e informashonnan aki ku e pueblo amante di futbòl pa asina nan por keda na altura di tur kos ku ta pasando den nos futbòl lokal i internashonal”.