“Si bo no train ta smoesje”

210
Rèfri 'Ricky' de Leca.
ORANJESTAD—“Si bo no train ta smoesje. Basta bo ke, bo por”, e rèfri di futbòl, kende ta e YDK riba lista di FIFA pa Aruba, Ricangel ‘Ricky’ de Leca, a deklará.

Esaki durante di un kombersashon ayera nochi, unda primeramente tabata kombersando riba e situashon aktual relashoná ku Coronavirus i medidanan riba nos islanan, pa seguidamente rekordando bon tempunan den futbòl lokal, unda ‘Ricky’ entre otro a mira akshon den futbòl lokal, ku tantu e ekipo di Sithoc, komo Vesta den e divishon máksimo di futbòl FFK.

Un ke otro despues ku tambe e tabata parti di selekshonnan hubenil lokal, siguiendo paso su ruman mas grandi Rivelino ‘Vino’ de Leca.

Despues e la sigui su karera futbolístiko na Aruba i finalmente ‘Ricky’ a bira rèfri i ta destakanado, unda manera e mes a splika ayera, e aña aki tabata esun ku a habri mihó p’e, unda ya e la dirigí internashonalmente na Jamaica i Kòrsou mes, den torneo U-20 i tabata programá pa dirigí tantu den Concacaf Caribbean Club Shield na Kòrsou, komo tambe den ‘Road to Gold Cup”, kual eventonan a keda posponé.

“Na tur momentu, lo bo por saka lo máksimo di tur kos. Awor aki mi ta train 2x pa dia. Mèrdia 12 pa 1 ta ‘break’ i bai kore, kual ta mi training normal den siman i wikènt mi ta kore atardi. Pero awor ku tur kos ta pará, mi ta train mèrdia i atardi, ya ku no tin training di beisbòl tampoko ku mi ta train e muchanan, ku tambe mi ta hasi. Kier men tin tempu sufisiente atardi despues di trabou tambe. Ta abo mes tin ku plania i traha bo skema. Si bo no train ta smoesje, paso si bo ke bo por” e ruman chikí de Leca a duna di konosé, splikando kon e ta tene su kurpa den kondishon durante di e periodo aki.