Jermaine Windster aktualmente e máksimo goliadó na Boneiru

94
Jermaine Windster.
KRALENDIJK—E futbolista Jermaine Windster aktualmente ta esun ku mas gol a anotá den aktual kampionato di futbòl na nos hermana isla Boneiru. Ta trata aki di e kompetensia bálido pa temporada 2019/2020, unda ya tur 10 ekipo partisipante a hunga 11 wega.

Jermaine Windster, kende ta futbolista di e ekipo di Uruguay, ta komandá despues ku ya e tin 16 gol anotá te awor. Esaki unda ta hungando den e di 2 buèlta di e kampionato regular.

Despues di Windster ta sigui Edshel Martha, kende ta ku Real Rincon,  ku a anotá 11 gol den e promé 11 weganan di su ekipo.

Miéntras ku na di 3 lugá riba e lista di esnan ku mas gol anotá na e isla di flamingo, tin Yurick Seinpaal di Atlétiko Flamingo. Yurick a anotá na 10 okashon durante di e 11 weganan di su ekipo te awor.

E trio ariba menshoná, ta e 3 nan tambe ku a anotá 10 gol of mas te awor.

Nan tras ku 9 gol anotá ta sigui Lacey Pauletta di Real Rincon i ku 8 gol, Leroy van Dongen di Uruguay i Jursten Trinidad di Vespo.

Miéntras ku 7 gol te awor, tin e futbolistanan Jerson Agostien di Real Rincon i tambe Giandro ‘Gigo’ Steba di Atlétiko Flamingo.