Kontagionan di COVID-19 ta subi ku 80% den 24 ora na Repúblika Dominikana

53
Miguel Vargas, kende tambe a tèst positivo na e vírùs di corona.

SANTO DOMINGO – Repúblika Dominikana a registrá 202 kontagio pa coronavírùs, un 80 porshento mas ku e dia promé i tres morto pa e enfermedat.

E minister di salú públiko di e pais, Rafael Sanchez Cardenas, a detayá durante un rueda di prensa ku un total di 56 persona ta hospitalisá i otro 142 isolá, na nan bibiendanan mes.

Sanchez Cardenas a sigurá ku Repúblika Dominicana ainda no ta den e fase di transmishon komunitario di e vírùs, pero a atvertí ku e datonan ta i diká ku esaki ta kana den e direkshon aki.

Ku e deklarashonnan aki, e ministerio a aludí ku mayoria kontagio ta relashoná ku tres foko konkreto, un kasamentu registrá na Punta Cana, krusero Costa Favolosa i un fiesta privá.

Entre e último personanan infektá tin tambe Miguel Vargas, kende a anunsiá djaluna último ku e tambe a tèst positivo na e vírùs, aunke ku ainda e no a sinti niun síntoma di e enfermedat aki. Ta trata aki di un persona konosí den mundu polítiko di e pais.

Vargas, di 69 aña, a hasi e tèstnan aki despues ku su yu hòmber Miguel Paul a sali positivo, despues di a akudí komo invitado na e kasamentu selebrá na Punta Cana 14 di mart tras di lomba.

Repúblika Dominikana ta den estado di emergensia for di djaweps tras di lomba, na momentu ku e gobièrnu a dekretá seramentu frontera i a klousurá komersio no esensial i a para tur aktividatnan kultural òf deportivo pa trata na para e kontagionan.

E gobièrnu dominikano a informá den fin di siman ku e pais ta konta ku serka di 450 kama destiná pa aislamentu di pashèntnan ku COVID-19 i ta traha pa amplia esaki te un total di entre 600 i 800.