Temblornan ta sakudí kapital di Kroasia kousando daño material i personal

43
Dañonan ku a keda registrá despues di e dos temblornan registrá den oranan trempan di mainta.

KROASIA – Dos fuerte temblor di magnitut 5.0 i 5.5 grado a sakudí Zagreb den oranan di ayera, djadumingu, kousando pániko, dañonan material i 17 herido.

E promé temblor, esun mas fuerte, a saka abitantenan di e kapital kroata for di kama, na alrededor di 6:24. 40 minüt despues esaki a keda siguí pa otro temblor.

Durante paso di dia a sinti vários réplikanan mas, aunke leve i sin kousa masha daño.

Pániko den kayanan
Miles di siudadano a sali riba kaya pa motibu di pániko, tambe hopi pashènt di e hòspitalnan prinsipal ku ta atendé personanan infektá ku COVID-19.

Masomenos 70 edifisio na e kapital a sufri dañonan grave i entre esnan heridá tin tambe un hóben di 15 aña ku ta interná, den estado grave, na un sentro médiko di e pais.

Episentro
E episentro di e temblor aki tabata na apénas 7 kilometer nort di Zagreb, na un profundidat di apénas 10 kilometer, loke ku ta splika dikon tabatin dañonan serio na diferente edifisio di e pais.