Gobièrnu por kousa desaster ekonómiko na Kòrsou: di reseshon pa depreshon

1696
Rueda di prensa djaluna a lanta hopi krítika.
Punda—For di e rueda di prensa djaluna último, no por a dedusí spesífikamente kon gobièrnu di Kòrsou lo re-aktivá e reseshon kousá pa medidanan di intervenshon di viro corona Covid-19. Despues di e rueda di prensa, gran parti di a komunidat komersial na Kòrsou a keda desapuntá.

 

Ta un reakshon lógiko tambe kousá pa falta di ekspertisio di parti di tur e tres ministernan konserní. E falta di konosementu riba e materia a trese hopi insiguridat riba e resultado di un rueda prensa ku tabatin Kòrsou pendiente. Lokual hopi no ta realisá ta “Distansha Sosial” ta kousa su propio ekonomia kombiná ku faktornan di krísis. Den e situashon aki, ekonomia ta bira un siensia básiko. Mester perkurá pa gastamentu riba merkado di konsumo, simplemente “kome bebe drumi warda. “Kon e ta funshoná den práktika.

Distansha Sosial ta kousa un bahada serio den demanda kolektivo. Konsekuentemente, si no tin un produkshon simétriko ku e bahada kolektivo, e Produkto Nashonal Brutu ta baha. Por ehèmpel, si sera tur hotèl, demanda pa estadia ta baha miéntras e hotèlnan no por produsí divisa. Un otro ehèmpel na nivel mas mikro. Prevení aglomerashon na snek i toko, demanda pa alkohòl ta baha i si e  snek i toko no bende i no por paga su debe na banko. Pues. Distanshamentu Sosial, aparte di ta afektá nos bida sosial, e ta afektá nos ekonomia tantu na nivel makro komo mikro. Gobièrnu no por keda sin prevení e falta di produkshon. Den kaso di Kòrsou, mayoria di nos produkshon ta na nivel di servisio por ehèmpel hotèl, banko i e snek na nivel mikro. En todo kaso dor di Distansha Sosial, Gobièrnu ta prevení aktividat ekonómiko i konsekuentemente ta partisipá na inisio di un reseshon. Si  e medidanan pa prevení e reseshon no drenta na tempu, e reseshon por resultá den un depreshon kousando dañonan serio na e ekonomia. Gobièrnu no por keda ousente pero tampoko no por bai uza e èrmèntnan robes bou di pensamentu ku demanda lo subi òf krea mas fasilidat di krédito. Esakinan ta kousa mas daño i yuda trese Kòrsou mas serka di un depreshon. Pa tal motibu Union Oropeo a konsehá tur miembro pa “gasta tur kos numa komo último rekurso”. I den kaso di Distansha Sosial i mihó manera ta pa garantisá salario den e pais. Hulanda por ehèmpel ta garantisá kasi 90% di tur salario serka kompanianan ku a hiba pèrdida for di 1 di mart i na islanan BES nan ta paga 80%. “Bo mester tene negoshi na bida” i garantisá empleo”. E úniko manera pa hasi esaki ta pa hasi gobièrnu bira e pagadó di último rekurso. Di e manera aki, en bes di manda empleadonan kas den kalke forma posibel ta mantené nan na trabou pa por sigui paga nan debe i fakturanan. Aktual gobièrnu djaluna último a proponé lo kontrali. Pensando ku krea fasilidat tei solushoná e problema ta un aserkamentu robes. Empleadonan mesora mester risibí benefisio dirèkt en bes di bira un peso pa nan dunadó di trabou. Sin demanda e dunadó di trabou no tin likides pa finansiá empleo, sigur no pa 3 òf 6 luna largu. De fakto, kisas ni un luna. Den e forma aki, nan no ta un kosto pa e doño di trabou, miéntras gobièrnu ta invertí den mantenshon di e demanda kolektivo. E kosnan básiko ku ta drai un ekonomia ta sigui, manera menshoná, kome i bebe. E solushon di mantené i no krea demanda, ta benefisioso prinsipalmente pa e gremio di entrada mas abou. Prinsipalmente den un ekonomia moderno, kaminda trahamentu na kas no ta un luho mas. Empleadonan den e gremio di entradanan mas abou probablemente no tin medionan di spar pa por mantené nan komportashon di kompra. Den e kuadro aki por hasta bira kreativo  i en bes di buska na paga salarionan den sierto sektor di komersio kisas lo ta mas efektivo pa kuminsá paga salario segun skal di entrada. Mas abou e salario di e trahadó ta mas progresivo e kompensashon mester bira.  Na Hulanda, kompanianan mester reportá nan atministrashon na gobièrnu. Kostonan di operashon manera hür, utilidat interes riba debe, seguro. E punto di salida ta pa paga kostonan di salario pero si e daño ta mas grandi, gobièrnu mester paga frakshon di e kostonan tambe!

Ekonomianan mundial no tin otro opshon sino pa apliká e sistema aki. E reseshon ta kousá pa rason nan for di aplikashon robes di instrumentonan ekonómiko i monetario. Salubridat no tin nada di aber ku kreashon di ekonomia. Mas aleu no mester lubidá tampoko ku no ta solamente turismo i horeka ta wòrdu afektá pa Covid-19. Un tékniko di erko, ku ta traha serka un kompania priva kual kompania ta duna servisio na e hotèl, tambe mester bai kas meskos ku e weiter den bar dje hotèl. Ta kestion di hasi bon kalkulo i yega na kuantu sèn e strategia tei kosta Kòrsou. Segun Jose Jardim, presidente direktor di Banko Sentral, nos mester di alrededor di 930 mion florin.