Maduro ta anunsiá ‘radikalisashon di karentena’ na Venezuela

54
Nicolas Maduro, presidente di Venezuela.

CARACAS – E kasonan konfirmá di coronavírùs na Venezuela a subi i alkansá 77, segun e último balanse ku a keda ofresé for i djadumingu pa e gobièrnu di e presidente Nicolas Maduro.

Den aktualisashon di djasabra tras di lomba, e gobièrnu a informá di 70 kaso positivo. 57 di e 77 kaso di kontagionan indiká den oranan di djadumingu ta den e área metropolitano di Caracas i na Sentro-Nort di e pais. Segun Maduro a indiká ademas, ‘tur importá’.

Segun e informashon ofisial, e mayoria di esnan infektá tabatin orígen na entre otro Spaña, 21, siguí pa Colombia, 10, i Estádos Unídos,3.

Aunke ku tin un preokupashon ta reina debí na e kondishon di e sistema sanitario di Venezuela, e mandatario a insistí ku gobièrnu ta konta ku tur e rekursonan nesesario pa asina por duna kara na e pandemia aki.

Esaki a sigui indiká ku ta danki na e kolaborashon di China i tambe di Rusia, ku nan na Venezuela tin tur loke ku ta nesesario pa enfrentá e kasonan. Tambe el a hasi menshon di yegada di un delegashon médiko kubano, formá pa 130 dòkter.

Medidanan ekonómiko
Nicolas Maduro a dekretá un seri di medidanan ku kua e ta pretendé di redusí e impakto ekonómiko pa e karentena kolektivo ku tin na e pais i kua tin e pais paralisá.

El a indiká ku lo tin ratifikashon den e medidanan ‘inmobilidat laboral’ i a ordená e suspenshon di e pago di hür di komersio i bibienda prinsipal durante seis luna.

Tambe el a indiká ku su gobièrnu lo implementá un plan di pago pa industrianan chikí te ku luna di ougùstùs próksimo.

Tambe a anunsiá un serio di bónus nan spesial destiná na trahadónan informal i di e sektor privá pa mart i aprel.

Mas di seis mion di trahadó lo risibí e siman aki algun bónus via di nan ‘Carnet de Patria’.

Denunsia kontra Estádos Unídos
Maduro un biaha mas a denunsiá Estádos Unídos pa e sanshonnan ekonómiko ku e gobièrnu di Trump ta mantené i a sigurá ku esaki nan ta impedí su atministrashon di por reforsá hòspitalnan ku suministro médiko.

Ademas a indiká ku tin ‘konspirashonnan’ kontra su gobièrnu mei mei di e krísis provoká pa e pandemia aki. El a indiká ku for di Estádos Unídos a aktivá un plan pa trata di realisá na Venezuela un proseso di destabilisashon i un gòlpi di estado.

Maduro a konkluí instruyendo na Jorge Arreaza, pa regla e regreso di 200 venezolano ku ta pegá na Estádos Unídos mei mei di e restrikshonnan di biahe aktual, meskos ku e sanshonnan ekonómiko di Washington ku ta restringí konekshon aéreo entre ámbos paisnan.