Wardakosta huntu ku Defensa ta bai kontrolá kosta mas intensivo

Bo mira algu sospechoso riba laman, yama Wardakosta riba 913

77
Lo bai intensiva e kontròl e dianan aki.

Willemstad—–Siman pasa Sentro di Reskate di Wardakosta a risibí diferente alerta ku lanchanan lo ta hasi intento pa yega islanan ABC for di Venezuela. Un lancha a ser detené na kaminda pa yega e islanan i un otro lancha aparentemente lo a senk den awanan teritorial di Venezuela.

Wardakosta di Venezuela huntu ku Wardakosta di Karibe a buska den nan awanan teritorial despues di e insidente. Lástimamente no a logra enkontrá ningun persona. Ta konosí kumayoria di e lanchanan ta den hopi mal estado di mantenshon i ku e transporte ta bai di un forma iresponsabel kaminda ta hiba muchu persona na bordo di un boto chikitu. Na bordo no tin kasi nada di seguridat. Wardakosta ta alerta personanan pa no kuminsa na e biahe peligroso akí. Na e momentu akí frontera ta será komo medida pa limitá e vírùs di corona. Tráfiko marítimo ta prohibí pa nabega yega nos isla. Pa e motibu akí Wardakosta a tuma èkstra medida pa proteha e kosta i lo patruya mas intensivo ku yudansa di Defensa e periodo ku ta bini. Wardakosta ta hasi un súplika tambe na habitantenan pa na momento ku mira algu sospechoso òf peligroso riba laman òf na kosta, pa yama Wardakosta riba e number 913. E number akí ta alkansabel di dia i anochi. Barkunan riba laman tambe por tuma kontakto ku e Sentro di Reskate di Wardakosta via di e kanal VHF 16 na momentu ku nan mira algu sospechoso òf peligroso riba laman.•