Problema den prizòn di Perú ta laga saldo di dos morto

85
E situashon a keda kontrolá ku yegada di mas personal di seguridat na e prizòn.

LIMA – Un total di dos persona a pèrdè nan bida i otro 17 mas a resultá heridá durante un problema entre prezunan na e prizòn di hende hòmber na Trujillo, na nort di Perú. Aki aparentemente nan tabata eksigí medidanan pa por enfrentá e epidemia di coronavírùs.

E kabesante polisial na e region di La Libertad, general Lucas Nuñez, a konfirmá morto di dos prezu despues di a keda trasladá heridá pa un sentro médiko. Esaki despues ku un grupo a kue vários trahadónan komo rehen pa asina intentá un fuga masivo.

E Instituto Nashonal Penitensiario, a informá ku e problemanan a keda protagonisá pa e prezunan di El Milagro, kua a subi daknan i a traha algun buraku den muraya pa intentá hui.

E forsanan di seguridat mesora a pone medida i intentá pone un paro na loke tabata sosodé pero esaki nan a kontinuá violentamente ku nan akto. Pa e motibu aki mester a hasi uso di forsa pa por restablesé kòntròl.

Vigilantenan tumá komo rehen
E Agensia Ofisial Andino a señalá ku e problema a inisiá na momentu ku e prezunan a kima kolchon i a traha un buraku den muraya pa aparentemente intentá drenta den un zona konosí komo ‘tierra de nadie’.

Despues ku a kue e vigilantenan komo rehen i esaki ta loke a motivá yegada di otro 140 agente polisial, kende nan a manda algun gas pa kore ku e grupo di prezunan i di e forma aki tuma kòntròl di e situashon.

Despues di a logra kontrolá e situashon, miembronan di ehérsito a yega na e prizòn pa asina reforsá seguridat, ya ku famia i amigu di e prezunan a yega na e sitio pa protestá.

Medidanan pa coronavírùs
E Ministerio di Hustisia a informá ku nan ta adoptando medida nan pa asina redusí e rísikonan di kontagio di coronavírùs den e prizònnan di e pais. Entre esaki nan ta inkluí restrikshon na bishitanan, charla preventivo i kompra di produktonan sanitario.

Apesar di e medidanan, entre 19 i 22 di marr tabatin un total di 3 diferente aktonan di violensia. Den ningun di e suseso nan aki no a produsí un fuga di prezu.