Supermerkadonan ta pidi protekshon polisial

1248
Punda–  E asosashon di supermerkadonan na Kòrsou, SUVECO a manda un karta pa Gobièrnu di Kòrsou. Den  e karta e asosashon a ekspresá su prekupashon.

E karta firmá pa presidente di e asosashon, Joël Gois, ta mustra gobièrnu ku komportashon di kompra den supermerkadonan a kambia na Kòrsou a konsekuensha di Covid-19. Entre otro klientenan a kuminsá “hamster” (kumpramentu bòncha/hopi kantidat di mesun produkto). Mayoria di e produktonan di “hamster” ta forma parti di e asina yamá makutu básiko. Segun SUVECO ta bira difísil pa kontrolá e fluho di kliente i krea un proseso di kompra mihó kordiná. Nan ke mira entrada i salida mas kontrolá i tambe restringí e hamstermentu ku ta tumando lugá. Si esaki no wòrdu kontrolá segun SUVECO ta bini skarsedat den e supermerkadonan. Pa tal motibu nan a supliká protekshon na gobièrnu di Kòrsou dor di apuntá presensha polisial na e supermerkadonan miembro di SUVECO òf pone protekshon armá.