No tin ganga: no tin duda algun na momento yega negosashon
ku Hulanda i si Knops tei ainda, “lo no tin ganga”.
Esei Knops a bisa na diferente okashon kaba.

Punda— Ta un hecho ku gobièrnu di Kòrsou ta bai risibi  sosten finansiero di Hulanda durante 2021. Pero Hulanda tambe ta impon’é su eksigenshanan i kondishon. Kòrsou su debe nashonal por oumentá mas tantu i surpasá 4.2 miar florin na 2021. Esaki si konsiderá ku presupuesto 2021 ta plania na sera ku un défisit di 681 mion florin. Sin un fiansa adishonal di Hulanda di por lo ménos 600 mion florin, Kòrsou no ta logra paga su gastunan. Na e momentonan aki e saldo di debe nashonal ta na 3.8 miar florin.

Parti di e debe aki a madurá for di 2010 i mester a wòrdu pagá bèk. Despues di un aña di risibi sosten finansiero, Hulanda i Kòrsou ainda no a sera un akuerdo fiho riba repago di e fiansa. Aparte di 700 mion adishonal na 2020 mas un posponementu di 82 mion florin, tin kologando e suma ku mester fia durante segundo mitar di 2021. Durante firmamentu di e Pakete di Pais, Raymond Knops a menshoná un posibilidat pa restrukturá un parti di e fiansa bionario, pero den su karta  kuminsá splika Den Haag ku ya 82 mion di kanselashon mester bolbe bai bèk den un repago di 15 aña. Ta lógiko ku Kòrsou no tin e kapasidat pa paga e debenan menshoná. Maneho finansiero di gobièrnu di Kòrsou ta bira pa 75% dependiente di Hulanda su kapasidat di fiansa i bou di kua kondishonnan. Entre otro, un suma di 82 mion florin ku Kòrsou mester paga pa 2020, a wòrdu transformá den un fiansa di 15 aña sin interes miéntras tambe a bini 286 mion florin adishonal na Novèmber 2020 pa finansiá e di tres tranche den programa di NOW i Fondonan di Sosten kual a yega en total 670 mion pa 2020.

15 di òktober 2020, Kòrsou mester a paga Hulanda bek e suma di 82 mion florin. Ta trata di un fiansa pistolero kual e suma mester wòrdu pagá bek den un pago. Segun Knops ,a transformá e fiansa aki den un fiansa den 15 aña sin interes. Orígen di e fiansa no ta konosí pero na 10-10-10, Hulanda e Kòrsou a kumbiní pa transformá un suma di 1.7 miar florin den obligashon kual 100 mion mester paga na 2020. Ta keda den diskushon ainda den ki forma e sosten di likides ta bai tuma lugá na 2021 i tambe kiko e gobièrnu nobo ta bai hasi pa renegosha e debe.