Back to Top
Responsive image
E korant di pueblo

545 mion ku gobièrnu no ke papia riba dje


April 10, 2020 • 6 minüt pa lesa

Punda- Kabinete Rhuggenaath huntu ku su ministernan Gijsbertha, Mc William, Camelia Romer, Konket, Koeiman, Jesus Leito i Girigorie tin akseso na un suma di 545 mion miéntras ta yorando na Hulanda riba un miserabel 177 mion florin.

Sin un kapasidat di desishon den e kabinete, Kòrsou ta destiná pa kai den un reseshon ekonómiko pa finalnan di aprel i despues un depreshon na mei. E siguiente paso ta bira miseria, probresa i krímen. Sin un desishon nos tur lo eksperensha probresa na gran eskala.

Unda e 545 mion ta

360 mion na Banko Sentral
Manera Vigilante a bini ta splikando, riba kuentanan di Banko Sentral prosedente fo’i diferente banko off shore, tin su suma di 360 mion florin di fris for di 2006. Ta trata di kuentanan konfiská pa Banko Sentral . Mayoria si no ta tur e kuentanan ta prosedente for di klientenan di  e banko First Curacao International Bank, FCIB. E banko tabata wòrdu dirigí pa John Deuss i na 2006 a deskubrí ku bou di supervishon di Banko Sentral Deuss tabata krea fasilidat pa kompanianan oropeo laba plaka via dor di desviá e sistema di Impuesto riba Benta (omzetbelasting/”VAT Froud”) britániko. Servisio di Impuesto a akusá Banko Sentral di Kòrsou di a laba riba 10 Bion florin via desvio di Impuesto. Entre 2006 pa 2019, 13 aña largu a tuma lugá diferente proseso di investigashon resultando den konfiskashon di miónes. Banko Sentral despues di trabounan largu a logra limpia kasi tur kuenta pendiente algun ku ainda ta indikativo di tabata envolví den labamentu di plaka. A resta riba e kuentanan un suma di riba 195 mion dòler blòkia pa Banko Sentral pendiente un investigashon final di Ministerio Públiko. Minister di Finsansa, Kenneth Gijsbertha a konfirma ku e sen tei.

Na yüli último un grupo di kompania, e.o. Corbiere Trust a hasi nan último intento pa haña nan sèn, pero Banko Sentral a ninga esaki. Den korte, durante tratamentu a bin sali na kla ku na 2017 i mei 2018, Ministerio Públiko a drenta Banko Sentral i konfiská dokumentonan di e kompanianan ku tin nan kuenta blòkiá na Banko Sentral. Banko Sentral a duna di konosé na Korte di no tei laga e sen los pasobra tur ya ta asigná pa bai riba kuenta konsigna. E informashon a bini dirèkt for di 4 representante den Banko Sentral sintá dilanti un wes sivil. Ministerio Públiko a konkluí nan investigashon pasobra riba pasobra riba 3 di febrüari último, Jose Jardim Presidente Direktor di Banko Sentral, den un rueda di prensa a konfirmá ku tantu na investigashon komo esun di Ministerio Públiko a konkluí ku e sèn ta ilegal.

Wes den korte for di sèptèmber 2019 ta pendiente di un kontesta riba e sèn Minister di Finansas Kenneth Gijsbertha, enkargá ku maneho di Banko Sentral no tabata na altura di e informashon te ku djaluna 6 di aprel ultimo. Si akaso Ministerio Públiko i Prokurador General informá Minister di Hustisia ku e plakanan di fris riba nan kuentanan ta prosedente di krímen, Banko Sentral tin akseso na e bolsa.

Abodadonan a bini foi Hulanda pa buska e deposito mionario di fris

Strategia: Konfiská e sèn promé ta lat. E desishon n’e momentunan aki ta den man di Prokurador General Roger Bos, kende ta kondinando e investigashon riba e sèn. Presidente Direktor Jose Jardim, kende ta un yu di Kòrsou, pronto lo wòrdu remplasá pa e ulandes oropeo Richard Doornbosch. E Presidente Direktor nobo di  Banko Sentral ta risibí via di Prokurador General  e poder mayoritario pa risibí instrukshon di Ulanda i Banko Sentral Ulandes kiko finalmente tei pasa ku e sèn. Mester eliminá a korto plaso e proseso pa laga e 360 mion subi e kuenta di asignashon. Si esaki resultá, nos por bien lubidá riba e sèn. Netamente esaki ta lokual tei sosodé tambe si nos ministernan sinta ketu den Fòrti, lamentá den direkshon di Ulanda.

72 mion benta UTS
Na mart último, United Telecommunication Services a firma un akuerdo di benta ku e kompania Liberty Latin America Ltd. Un total di 339 mion a sera e dil kompleto pero solamente 142 mion a keda disponibel pa repartishon na interesnan di akshonista, den e kaso aki gobièrnu. Ya den diferente artíkulo Vigilante a splika repartishon di e fondonan prosedente di benta, pero al final 72 mion florin nos por tin akseso riba dje si forsa e kompania kende ta hunga doño di UTS paga tur kos.

For di e benta neto di 142 mion florin (brutu 339), n’e momentunan aki a risibí 72 mion for di kual 66 mion a bai pa CMC por finalisá fase di implementashon. E demas 72 mion florin ta den kuentanan transitorio (escrow). Den e dil ku Flow Liberty, UTS a firma  ku for di e 72 mion florin riba escrow, Kòrsou tei risibí solamente 10 mion e aña aki. Segun Minister di Finansas Kenneth Gijsbertha e pago di e 10 mion a tuma lugá na final di mart último, pero pa rason deskonosí Kòrsou mester a manda 6 mion bek pa Liberty. Aparentemente tabata pa motibu di valuashon robes di e aktivonan riba balansa di UTS na momento di benta. E saldo neto for di escrow te ainda ta na 4 mion florin risibí. Demas 54 mion florin lo ta disponibel te otro aña. Esaki ta nifiká ku na saldo Kòrsou a keda ku 4 mion plùs 5 mion miéntras CMC a paga bek 13 mion florin. En total 22 mion florin. Di e 22 mion florin segun Minister Gijsbertha, 6 mion florin a bai Sehos. A keda neto den Kòrsou su man te ainda 12 mion florin i ainda mester risibí 60 mion te otro aña. Einan ta yega na 72 mion florin. Pero 60 mion ta riba un kuenta intermediario i mester di dje!

Segun e dokumento ku Rhuggenaath a firma ku Ulanda, e asina yamá Akuerdo di Kresementu e sèn mester subi kuentanan di e kompania Curacao Development Institute ku na su turno lo traspasá tur riba kuentanan di Invest Curacao. Esaki ta informashon konfirmá pa tantu minister Gijsbertha komo Minister Rhuggenaath durante ruedanan di prensa.  Mester tene kuenta ku kasi  60 mion ta di fris riba kuentanan intermediario pa finansiá eventual kleim ku presentá despues ku e benta a tuma lugá. Invest Curacao, kual instituto Raymond Knops a konsehá pa laga Ulanda set up, ya kaba a menshoná ku tur lokual gobièrnu di Kòrsou bende ta bai pa Invest Curacao. Esaki ta nifiká ur lokual a generá fo’i benta di UTS ta wòrdu repartí. E 60 mion ku mester risibi ainda tambe ta bai pa Invest Curaçao. UTS a wòrdu bendí pa 339 mion total. Segun Gijsbertha, despues di deskontá tur kos ta sobra 142 mion florin. Di esaki 1 mion te ainda ta disponibel pa invertí miéntras 11 mion ta riba kuenta na Banko Sentral supuestamente.

Kenneth mester bai profundo den dil ku Liberty pa buska 60 mion

Strategia: 60 mion di e 72 mion ta disponibel te ku 2021. Esnan kende a traha e dil a burla di gobièrnu i pueblo di Kòrsou. Liberty/Flow den 2 aña ta paga UTS ku su mesun sèn ku e por a traha sin a bende su akshonnan. Un akuerdo bou di mesa pa krea mas posibilidat pa Flow generá cash fo’i UTS su propio operashon. Mester renegosha ku Flow i trata un klóusula di pre-pago riba e 60 mion riba kuentanan escrow.

60 mion SEO (10 mion benta Kura Ulanda)
SEO, Stichting Economische Ontwikkeling, ta un fundashon ku for di 2015 ta tratando na destituí i na Febrüari 2019 esaki a tuma lugá. E fundashon ta un fundashon ku su propio entidat pero prosedente for di fondonan di gobièrnu. Momento a destitui e Fundashon a keda atras alrededor 20 mion florin na sèn i 40 mion na aktivo mediante bolsa di fiansa otorgá na e.o. Proyekto di Hotel na Santa Barbara i Kura Ulanda. E konstelashon di e fiansanan no ta muchu konosí, pero bou di aprobashon di Gijsbertha ta tratando na manda e 40 mion na aktivo i mas 20 mion pa Korpodeko. St. Maarten kende na 2017 a risibí plaka for di SEIO a depositá 8.5 mion florin dirèkt riba kuenta di nan gobièrnu pa yuda finansiá nan défisit. Na Kòrsou, ta argumentando pa manda e sèn bek konforme statutonan di SEO na institutonan pa promové mas invershon en bes di pone e sèn dirèkt riba kuenta di gobièrnu.

Mc William mester yama SEO i Korpodeko huntu

Strategia: sinta ku Korpodeko i SEO pa hasi un sondeo riba kuantifikashon di lokual SEO tin i lokual a bai Korpodeko.

54 mion na Benta CPA
Tantu Minister di Finansas Kenneth Gijsbertha, Promé Minister Eugene Rhuggenaath a konfirmá públikamente ku 34% di akshonnan den CPA ya ta kasi bendí. Mesun informashon a wòrdu konfirmá pa direktor di CPA, Humberto de Castro. Ta e intenshon kumbiní pa bende 20% na Haf di Rotterdam i 14% na APC, e fondo di penshun lokal. Kestion ta kuantu 34% di akshon den haf di Kòrsou ta bal. Ekspertonan finansiero di komptabilidat na APC n’e momentunan aki ta kalkulando e balor di 14% di nan futuro atkishon den haf. Fuentenan verídiko den seno dje kálkulonan na APC a indiká ku APC a paga 10 mion florin pa 6% di akshon ku tabata den man di Korpodeko. Korpodeko a bende APC na partisipashon den haf i ekspertonan na APC ta saliendo fo’i un punto di bista brutu ku kada % den CPA ta bal alrededor di 1.6 mion florin sin deskontá balornan di aktivo pafó dje balans finansiero di CPA. Fo’i punto di bista kalkulativo indikativo 1% ten haf ta bal brutu 1.6 mion, ta nifiká ku 34% ta bal brutu por lo ménos 54,4 mion florin (34×1.6). E negosiashonnan ta den proseso ainda, pero ta definitivo ku tur benta akumulá for akshona den CPA ta bai direkshon di e  fundashon CDI pa despues subi kuenta di un banko nobo ku tei yama Invest Curacao, kual gobièrnu ulandes a forsa Kòrsou pa firma den e dokumento Strategia di Kresementu.

Eugene Rhuggenaath ku 177 mion no por hasi nada

Strategia: Strategia: bende APC mas lihé posibel nan 14%. Esaki ta suma indikativo na 22.4 mion florin. Mientrastantu ta aselerá e proseso pa Port of Rotterdam tambe kumpra su 20%, lokual ta suma 32 mion florin indikativo.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.