Back to Top
Responsive image
E korant di pueblo

‘Acha’ ku 2 gol pa yuda Dominguitu gana Victory Boys 4-0


June 30, 2020 • 1 minüt pa lesa

WILLEMSTAD—Tereno di Stadion Ergilio Hato na Brievengat, ayera tabata esenario pa un di e dos weganan, ku a duna kontinuashon na e kampionato di futbòl FFK, den promé divishon. Un ke otro bálido pa temporada 2019/2020, despues ku for di luna di mart no tabatin futbòl, debí na Coronavirus.

Ayera a reanudá, unda a hunga 2 wega di forma simultáneo, ámbos sin ku por tabatin presensia di fanátiko den stadion.

Riba tereno di SDK, tabata e ekipo di Centro Dominguitu, dirigí pa Yacir Hyman i Victory Boys, ku ta bou di direkshon tékniko di Marcelo ‘Chelo’ Marceli, ku a enfrentá otro.

E wega aki a keda dirigí pa rèfri Edsel Dimie, kende a konta ku asistensia na liñanan di Alejandro Wilson i Pablo de Avila, miéntras ku Nadine Carolina tabata e di kuater ofisial di e wega.

Tabata un anochi bastante fásil pa e ekipo di Dominguitu, ku ta logra triunfo pa goliada, ku skor di 4-0.

Un ke otro despues di tabatin bentaha di 2-0 na sosiegu. Ámbos gol den e parti inisial, a bin for di kabesaso, unda ku Ashar ‘Acha’ Bernardus ta habri anotashon ku un golaso, riba un tiru di skina kobrá pa Shurwendell ‘Pito’ Roosje, pa seguidamente Gedion Poppen anotá for di un tiru liber kobrá pa ‘Acha’.

Den e parti komplementario Bernardus ta anotá su di 2 gol di anochi pa duna su ekipo bentaha di 3-0, pa finalmente Randell Winklaar pone e skor final na 4-0.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.