Punda– Fundashon Akshon Awor riba djadumingu 15 di novèmber a lansa un petishon online di firma riba nan website  www.akshonawor.com.

Akshon Awor ke kolektá mas tantu firma posibel pa manda un señal na polítika di Kòrsou i Hulanda ku hopi siudadano ta interesá den haña relashon mas estrecho ku Hulanda i ku nan ke disidí riba esaki den un referèndem legal. Akshon Awor ta invitá tur siudadano pa firma e petishon i kana e kaminda pa un kambio di 180 grado pa un mihó futuro.

Segun sra. Dana Bernardo, sekretario di AkshonAwor: “Bira munisipio igual tin hopi bentaha pa nos komunidat, miéntras nos ta mantené nos dushi idioma, kultura i nos forma di biba, meskos ku Brabant, Limburg i Friesland ta mantené di nan, i asta ku mas rekurso pa mantené nos identidat úniko. Nos por hasi yamada riba fondonan hulandes pa garantisá entre otro mihó enseñansa, ‘uitkering’, mas kòntròl i mas seguridat. Nos derecho di outodeterminashon ta pone e desishon riba nos futuro kompletamente den nos man. Tin hende ku no ke pa nos hendenan habri wowo i ta purba spanta nos ku e mesun gritunan emoshonal i bashí di sklabitut i kolonisashon pa nan no mobilisá pa progreso.

Tin ta bisa kue kambio lo no pasa nunka i ta entregá promé ku sikiera hasi tur posibel esfuerso pa logra igualdat. Nos sí ta kere ku nos por logra igualdat real den Reino i ku ta ora pa laga nos kompleho di inferioridat nos tras i ban dilanti huntu. Si nos tabata pensa ku nos muchanan nunka no por a sali kampion mundial di beisbòl, nunka nos lo no a logra. Biba Kòrsou!” Riba e página wèp akshonawor.com ademas tin kontesta riba e preguntanan ku Akshon Awor ta haña ku mas frekuensia. Segun e fundashon ta ora pa kambio drástiko ya ku e sistema aktual ta laga un kantidat grandi dje poblashon na kaya kaminda ta mira un kresementu eksplosivo di pobresa.

Kòrsou a demonstrá di no por generá e fondonan nesesario pa para riba su mes pianan i garantisá siudadanonan seguridat i stabilidat. Den apénas 10 aña Kòrsou a suma un debe di riba ANG. 3.000.000.000 ku défisit tras di défisit 10 aña siguí sin ningun aña positivo i un kantidat rèkòrt di mandatario i medewerker karu ku ta sigui oumentá i pisa komunidat su saku ku ya no por karga e peso aki mas.

Oponentenan ta gusta bisa ku esnan ku ta opiná ku Kòrsou mester bira parti di Hulanda ke bende isla Kòrsou pa un saku di plaka, pero segun e fundashon esaki no ta kuadra ku bèrdat. Al kontrali, ta Akshon Awor ta sali hustamente na defensa di esnan sin bos ku gobièrnunan di turno a lubidá, pa yuda salba Kòrsou. Muchanan meresé e mihó futuro ku por ofresé nan. Tin figuranan i asta organisashonnan ku ta dediká nan mes na instigá kontra kualke  relashon ku Hulanda i pretendé ku ta malu so Reino ta pa nos, pero esaki simplemente no ta bèrdat.

For di dia ku Shell hulandes a habri un refineria lokal den 1915, Kòrsou a konosé desaroyo ekonómiko ku a habri kaminda pa Kòrsou por a krese i bira e komunidat multikultural ku e ta awe. Den apénas 60 aña poblashon a bira 5x mas grandi, di 30,000 pa 150,000 hende.

Un komunidat ku awe ta un ehèmpel pa mundu kon hende di tur kaminda a bini huntu i biba den libertat i harmonia ku otro sin importá kredo, rasa o religion. Ademas ku por bai studia i biba na Europa ki ora ku ta deseá danki na e pasaporte europeo. Mayoria yu di tera ta kontentu ku esaki i ta mira e benefisio nan grandi i e protekshon ku e relashon ku Reino ta sigui brinda Kòrsou.   

Den apenas 60 aña poblashon a bira 5x mas grandi, di 30,000 pa 150,000 hende. Un komunidat ku awe ta un ehèmpel pa mundu kon hende di tur kaminda a bini huntu i biba den libertat i harmonia ku otro sin importá kredo, rasa o religion. Ademas ku por bai studia i biba na Europa ki ora ku ta deseá danki na e pasaporte europeo. Mayoria yu di tera ta kontentu ku esaki i ta mira e benefisionan grandi i e protekshon ku e relashon ku Reino ta sigui brinda Kòrsou.