Back to Top
Responsive image
E korant di pueblo

Artikulo tokante enkargo di 62 mion no ta bèrdat i sigur ta un “fake news”


February 20, 2021 • 1 minüt pa lesa

Willemstad – Minister enkargá ku Salú, Medio Ambiente i Naturalesa Sra. Jesus- Leito a tuma nota di un informe ku a sali mas ku 1 okashon den un matutino lokal tokante un supuesto enkargo ku Sr. Sluis, kende ta direktor di Bureau Telecommunitie en Post, mester a haña òf regla pe. E publikashon aki no ta kuadra ku bèrdat.

Sr. Melfor, Sekretario General di e mesun ministerio ta desmentí esaki tambe kategorikamente. Ningun momentu so no tabatin ningun enkargo na Sr. Sluis pa hasi un òf mas proyekto na momentu ku e baha ku penshun.  Sr. Sluis no ta bai baha ku penshun tampoko e aña aki.

Den e periodo ku nos a drenta aki por spera e tipo di notisianan aki ku no bèrdat esta “fake news” ta sali pa desakreditá i krea deskonfiansa.  Ta di lamentá i di kondená ku esaki ta tuma lugá. Sinembargo e enfoke i empeño di Minister i e Ministerio ta keda pa sigui traha pa asina por desaroyá i fasilitá e.o.  agrikultura,  krio di bestia i peska. Asina durante di e último añanan, den kuadro di kombertí nos den un  “Smart Nation,” a bin ta prepará agrikultornan pa traha ku métodonan moderno pa produsí produktonan agrario.  Vários ta esnan ku a pasa dor di e proseso di preparashon i a finalisá nan estudio ku éksito serka Institute For Professional Excellence (IPE).  Aktualmente ta konkretisando terenonan pa netamente e agrikultornan aki traha riba nan propio kultivo ku métodonan di kultivo moderno. Ku e deklarashon aki Minister di Salú, Medio Ambiente i Naturalesa Sra. Jesus- Leito ta informá nos komunidat korektamente i spera ku e ”fake news” aki lo no sigui prosperá i krea konfushon den nos komunidat

Login