Bahada; e gráfiko ta indiká un bahada drástiko den kantidat di registrashon den e sistema di bakunashon. (strepi blou). Pa tal motibu ta importante pa desentralisá bakunashon i drenta barionan.

Punda—Tim di Bakunashon siman pasá a tuma un desishon importante. Ta bai drenta barionan di Kòrsou pa intensiva e proseso di bakunashon. Tin diferente rason pa e desishon, pero lokual sifranan di Vigilante ta indiká, un bon desishon si nan ke mantené un nivel di registrashon haltu.

Ta e intenshon pa e siman aki kuminsá prepará e medionan di transporte i depósito pa por garantisá e transporte i bakunashon tuma lugá konforme protokòl. E desishon pa bai bario no ta un sorpresa. Sifranan di registrashon último dos siman a bini ta variando miéntras e desishon pa “walk ins” a piek e registrashon pa 2 dia, pero no a sigui mantené e nivelnan sperá.

Manera Vigilante a relatá den pasado, for di 5 di aprel despues ku a habri registrashon pa públiko en general, a konosé un oumento den registrashon pa bakunashon. For un oumento di 2031 riba 5 di mart, Kòrsou a konosé registrashon diario ku bai di 6648 riba 6 aprel i yega un tòp di 8626 diario dos dia despues riba 8 di aprel. Riba 9 aprel, organisashonnan vital tabata por a kuminsá bakuna teniendo e kantidat di registrashon na 3.364 diario. Apesar di a tuma mas medida di ampliashon, habri Ergilio Hato i  Parera despues WTC riba 14 di aprel i walk ins, e kantidat di registrashon diario no a subi 4 mil pa dia.

De fakto, a konosé oumentonan riba mil registrashon te ku 16 di aprel pa despues baha bou mil registrashon. 17 aprel 700, 18 aprel 968, 19 aprel 250, 20 aprel 790, 21 aprel 621, despues a konosé oumentonan leve bek di mil registrashon riba 22 di 23 di aprel. Wikènt, 24 i 25 aprel a bolbe baha i yega bou di 500 registrashon pa ámbos dia. Ta trata di e oumento diario den kantidat di registrashon. Te ku ayera tabatin kantidat  total di 75.021 persona registrá i 68.472 persona bakuná. Pero, apesar di esaki, diariamente tin ménos persona ta registrando.

Falta por lo ménos 30.000 siudadano mas pa registrá pa Kòrsou por yega 106.000 persona bakuna. Si sali for di último dos dianan di registrashon na 500 persona, lo tuma alrededor di 2 luna mas pa Kòrsou por yega aserkamentu di su Herd Immunity, saliendo for di punto di bista tur hende lo pasa nan di dos bakuna. Esei asumiendo tambe ku no tin un bahada den e kantidat di registrashon diario bou di 500 persona.

E opshon pa bai den barionan di Kòrsou , mirando e sifranan di registrashon ta un bon desishon. Pronóstikonan ta indikativo ku e registrashonnan nobo, si gobièrnu no hasi nada èkstra lo keda bou di mil registro diario i kisas hasta baha bou di 500. Ta definitivo ku e proseso di registrashon ta bira determinante si Kòrsou lo logra yega un aserkamentu di e Herd Immunity. Bayendo den bario, por yuda limitá e saturashon dje kurva gráfiko. Pero mester ten na kuenta tambe e temporada di garantia pa 6 luna ku e bakunashon via Moderna i Pfizer ta dunando. Esaki ta despues di e di dos bakunashon.