Deliberá: un tim di Banko Sentral ta deliberá pafó di korte despues di un tratamentu kontra akshonistanan di Ennia.

Skalo—Diferente intento pa logra haña un reakshon di Banko Sentral no a duna fruta. Ayera den Vigilante a publiká ku Bolsa di Penshun na Ennia por pèrdè balor kolektivo. Gerensha di Banko Sentral, te ayera anochi no a duna un reakshon riba e pregunta si aseguradonan na Ennia tin motibu di prekupashon.

Despues di un tratamentu den korte sivil 21 di Mei último, diferente aspekto importante pa lokual ta trata e situashon na Ennia a sali na kla. E kaso a tuma lugá despues ku grupo Ansary/Parman a inisiá un proseso pa wak si korte por eliminá e medida di emergensha imponé for di yüni 2018. Grupo Ansary no a logra kita e medida emergente. Entretantu e veredikto di wes ta konosí, unda tin preskribí ku Banko Sentral lo tuma medida pa trata na rekuperá e kobertura ku a sali foi Ennia balorá na 851 mion. Unu di e desishon ku Banko Sentral a tuma ta pa inisiá un proseso di negoshashon pa benta di Banco Caribe. Na promé instante tabata papia di 80 mion florin, pero siman pasa, Vigilante tin verifiká ku e konsorsio di banko off shore no ke paga mas ku 60 mion. Aparentemente, Banko Sentral a bai di akuerdo ku esaki. Banco di Caribe i grupo Ansary, akshonista mayó den Banco di Caribe ta akusá Banko Sentral di ta bende e Banco di Caribe bou di su balor neto.

Un otro aspekto ku tambe ta den “pipe line” na Banko Sentral ta si ta bai devaluá e bolsa di penshun invertí na Ennia. Vigilante ta wardando for di djadumingu riba un kontesta, pero Banko Sentral no ta reakshonando. Manera menshoná, abogado di Banko Sentral Sabine Altena a konfirmá ku e daño total, segun nan kálkulonan ta 851 mion florin. Grupo Ansary tin un parti dje kapital di Ennia invertí den un kompania ku yama Kirby Corporation. Debí na e invershon kuantioso den Kirby, e bolsa di penshun na Ennia ta pèrdè kobertura i por resultá den un desishon pa devaluá e balor. Konsekuentemente, por tin riesgo ku aseguradonan pa un penshun na Ennia por bai atras na balor di nan penshun. Esaki por ta indikativo ku e maneho emergente hibá pa Banko Sentral no tabata unu efektivo.

Den kaso di Banko Giro, manera ta konosí, Hulanda a duna 170 mion florin na sosten kual ta forma parti di un bolsa di fiansa ku Kòrsou mester paga bek via impuesto. Den kaso di Ennia e saldo di daño ta 850 mion florin. Pa por mantené e bolsa di penshun na Ennia, sea gobièrnu ta intermediá ku finansiamentu òf tin di baha balornan di e penshun. Te ainda, CBCS no ke duna un deklarashon públiko riba esaki. For di aña pasá Grupo Parman, e akshonista mayó na Ennia Caribe Holding, ta tratando na kombensé korte ku e maneho na Ennia bou di funshonarionan apuntá pa CBCS, ta peligroso pa e kompania. Parman ta insistí ku fo’i dia a introdusí medida di emergensha ta atras so e kompania a bai.