Back to Top
Responsive image
E korant di pueblo

CHATA: Kòrsou mester eliminá tèst pa biaheronan ku a bakuná


June 3, 2021 • 2 minüt pa lesa

Willemstad,– Señora Helena Seferina Rojas ta bisa ku merkado ta pidi proseso di imigrashon mas fásil i tambe nan ta pidi e asuntu di tèst keda eliminá.

E ta splika ku mas pais den Oropa Merka i Karibe ta adaptando nan kondishonnan pa atraé mas turista i pues e kompetensia ta mas severo kompará ku aña pasa. Turistanan ta skohe unda nan kier bai fakansi.

E ta sigui splika ku Boneiru i Kòrsou a haña mes kantidat di “booking”, siendo semper nos tabata haña mas. Aruba a haña 70 mil turista den luna di mei kual ta kasi 80% di e kantidat ku nan tabatin promé ku Covid-19.

Den aprel Kòrsou su sifranan tabata hopi abou, 10% di loke tabatin promé ku Covid. Febrüari Mart el a bira 40%. Esaki pues ta un buraku enorme pa e sektor turístiko di Kòrsou.

Segun e direktor di Chata señora Helena Seferina Rojas pa nos ekonomia drecha i turistanan bin, mester laga turistanan bakuná drenta sin tèst òf ku ménos tèst. E ta splika ku mayoria pais na Oropa tambe ta akseptando merikanonan ku ta bakuná kaba sin masha rekisito i sin tèst.

E ta bisa ku si djis anunsiá un fecha ku ta kuminsá akseptá esnan bakuna sin tèst, esaki lo trese un kresementu di “booking”. si nos bisa por ehèmpel ku promé di yüli lo kita bakuna pa turista, sigur e ‘booking’ lo oumentá drástikamente mesora. Loke nos ta bezig kuné no ta sufisiente pa un turista bisa e ta bin Kòrsou. Hopi pais ya ta risibiendo turistanan ku a bakuná.

E ta splika ku tin diferente punto ku merkado ta pidi manera entre otro drecha proseso di imigrashon, esaki ta un desaster. Turistanan ta bisa ku e sistema di yena e formularionan i tambe e asuntu di antigen tèst ta trese un drama total i pone ku ta tuma hopi tempu di nan.

Chata a sugerí kaba pa traha un sistema ku ta funshoná manera e mester ta i pa e entrada di turista ta mas amikal pa e kliente, nan ta bisa ku esaki ta den proseso, pero ta wardando algun siman kaba. Chata a pidi tambe pa eliminá sierto rekisitonan, no mester eksihí pa e tin di prent tambe loke e tin kaba digital. E direktor di Chata ta bisa ku Kèrsou ta úniko pais ku no ta laga un pasahero subi avion sin un PCR tèst.

E eksigensianan di tèst ta Kòrsou so tin tantu asina. PCR tèst, Antigen tèst despues di tres dia i tambe e tèst ku sierto pais ta eksihí pa ora e biahero bai bèk su pais. El a splika por último ku TUI a bisa ku nan ta duda ku nan lo oumentá buelo nan pa Kòrsou, nan ta duda dor di e situashon di proseso na imigrashon ku ta pone ku hasta tin biaha nan empleadonan mester yuda pa paga e antigen tèst i nan no ta mira ku esaki ta stimulá nan pa subi kantidat di buelo pa Kòrsou.

Login