Back to Top
Vigilante banner image

Direktiva di FEBEKO ta kere den desishonnan responsabel ku ta na bienestar di un i tur


April 17, 2021 • 5 minüt pa lesa

Willemstad— FEBEKO ta lamentando e forma ku medionan di prensa i otro figuranan ta hasi sensashon ku informashon ku a yega serka nan, sin buska pa tende e otro banda di medaya i sa kiko realmente ta pasando. Netamente pa e motibu aki, direktiva ta hañ’é obligá di sali i aklará algun punto pa esakinan no bai biba nan bida.

Primeramente, nos kier para ketu riba e informashonnan ku ta sirkulando enkuanto e kantidat di weganan ku FEBEKO a proponé na ekiponan pa kampionato 2021. Ta asina ku FEBEKO a reuní ku ekiponan dia 16 di mart último kaminda entre otro nos a trata e tema kampionato 2021. Den e reunion aki nos a  presentá na ekiponan sifranan di aña pasá. A base di e sifranan aki, direktiva a konkluí ku lo ta mas responsabel i realístiko pa organisá e kampionato benidero di e mesun forma ku a hasié e aña anterior. Riba e punto aki, ekiponan ta di opinion ku aña pasá nan a asept’é, paso Kòrsou tabata den un situashon di emergensia. Direktiva ta pensa otro riba e punto aki.

Pa nos bai un tiki den detaye. Pa FEBEKO por organisá mínimo un kampionato igual na lokual nos a organisá aña pasá (2 buèlta), FEBEKO mester di mínimo un montante di NAf. 208.000,- florin. 89% di e montante aki nos a risibí komo entrada di spònser i donashon aña pasá. Pues pa nos por organisá mínimo un kampionato di dos buèlta, nos mester por sigurá ku nos ta haña tur e spònser i donashonnan di aña pasá. Ademas nos mester por haña na entrada maske ta un parti di e entrada di benta di karchi pa públiko tambe. Teniendo na kuenta medidanan stipulá pa Gobièrnu, tur kos ta mustra ku no ta sigur ku por tin fanátiko na wega. Ku esaki FEBEKO kier ilustrá ku si tin difikultat pa generá e sufisiente entradanan pa hunga e mínimo di wega manera aña pasá, kon faktibel lo ta pa FEBEKO hunga tres buèlta, manera ekiponan ta pidi? E situashon ekonómiko aktual di pais – afektá pa e pandemia di covid-19 – ta trese hopi insertidumbre riba e parti finansiero. Pa e motibu aki netamente, FEBEKO no tin klaridat ahinda riba entradanan di spònser i donashon, tampoko otro entradanan ku ta fiho.

Ya direktiva a kuminsá aserká personan i instansianan ku a yuda aña pasá i ku nos ta pensá ku lo por yuda e aña aki. Di nan banda nan no por duna un kontesta fiho ainda i nos ta komprondé esaki. Ademas,  tur kos ta mustra ku lo tin chèns ku Gobièrnu lo kòrta den e supsidio di Federashon di deporte i olímpiko Kòrsou (FDOK), kual ta nifiká ku probablemente  lo bai kòrta den e úniko entrada fiho ku FEBEKO lo mester haña den 2021 tambe. Nos ta di akuerdo i ta komprondé ku tin kosnan ku tin muchu mas prioridat ku deporte na e momentonan aki. P’esei nos no por sinta i warda riba Gobièrnu (nobo), manera algun ekipo ta sugerí. Ta konosí pa tur hende ku e situashon ku nos ta den aktualmente, tantu infekshon di covid-19 i situashon ekonómiko di pais, ta mas malu ku aña pasá. Konsiderando esaki, direktiva no por komprondé, ni tampoko sigui e pensamentu ku ta bibando, pa nos komo federashon responsabel hasi ,mas kos ku ménos rekurso, kompará ku aña pasá. Nos kier bolbe enfatisá ku e situashon aktual ta mas malu ku aña pasá, kompañá pa muchu mas insertidumbre pa loke ta trata e parti (di entrada) finansiero. En prinsipio, e situashon aktual ta rekerí pa FEBEKO, meskos ku otro organisashonnan di beisbòl den eksterior, baha gastu mas tantu ku ta posibel. Asina por kòrda kon aña pasá MLB a baha di 162 wega bai 60 wega. Asina tambe por menshoná kon Puerto Riko a baha su kantidat di weganan di kampionato e aña aki na 12 wega (WBSC, 2021). Apesar di e situashon aktual nos a opta pa tene kuenta ku e sintimentu di ekiponan i a proponé na nan den luna di aprel pa mantené i hunga e kampionato meskos ku aña pasá, esaki a keda te na proposishon.  Ta bon pa remarká ku ta danki na un maneho responsabel ku nos a hiba aña pasá, nos por a sera aña ku un saldo positivo. E saldo positivo aki ta hasi posibel ku awe FEBEKO por sera algun ‘buraku’ ku FEBEKO tin pa par di aña kaba i alabes organisá un kampionato mes kos ku e aña anterior, sin ku mester bai atras na e kantidat di weganan òf ku mester para e kampionato manera ku e situashon aktual ta sugerí.

Tambe direktiva a tuma nota ku tin e pensamentu ta bibando ku FEBEKO ta pone mas énfasis riba selekshon nashonal i no riba nos kampionato lokal. Nos ta rechasá e pensamentu aki. Aña pasá na momentu ku e direktiva aktual a sinta, nos a pone algun meta ku nos kier logra pa nos beisbòl en general. Dos di e metanan aki ta pa subi Kòrsou di posishon riba tabla di posishon mundial i pa hasi FEBEKO pa gran parti finansieramente outosufisiente. E dos metanan aki ta bai man den man ku otro. Logrando esaki, FEBEKO ta mira solamente benefisio pa nos beisbòl lokal, nos atletanan i tambe nos pais. Un evento importante manera Caribbean Cup lo kontribuí na yuda nos generá punto pa asina subi di posishon, e lo yuda nos subi nos nivel di beisbòl i generá fondo direkto i/o indirektamente. Tambe un evento asin’aki lo kontribuí direktamente ku e sektor mas afektá den nos komunidat aktualmente ku ta e sektor di turismo. Pa no lubidá ku tipo di eventonan asin’aki ta trese un klima di positivismo i di distraishon den nos komunidat. Esaki ta imperativo mas awor ku nos ta pasando den un situashon difísil aki na Kòrsou. Un ehèmpel resien ta e brisa positivo ku nos selekshon nashonal di futbòl, ku a hunga un evento internashonal aki na Kòrsou, a trese.

Nos kier bisa aserka ku tur lokual nos a logra te ku aworakí pa ku e selekshon nashonal ta danki na spònser i gran parti di donashonnan di instansianan i nos (èks) hungadónan profeshonal. Aparte di esaki, nos selekshon ta lusiendo bon danki na nos kuerpo tékniko ku dia aden dia afó ta hasi milager ku e tiki rekurso ku nos ta disponé di dje. Nos no por keda sin menshoná e sakrifisio ku nos hungadónan ta hasiendo kual tambe ta kontribuí na e totalidat. Pa loke ta gastunan di Caribbean Cup ta asina ku kada ekipo partisipante mester kubri nan mes gastunan di estadia, kuminda i transporte. FEBEKO ya a haña pa su selekshon e parti di transporte di spònser. Kuminda i estadia tambe FEBEKO a haña na un preis hopi abou. Pa kubri e gastunan ku nos tin pa e torneo aki, nos ta trahando duru dia aden i dia afó pa kumpli ku e kompromiso ku nos a hasi na COCABE. Den kaso ku no ta alkansá mas pa nos hasi un torneo responsabel i seif, nos lo komuniká esaki na e organisashon internashonal debidamente.

Poniendo tantu e interes di nos miembronan, nos peloteronan komo interes di e federashon den balansa,  FEBEKO ta haña ta nesesario pa nos tin un enfoke balansá tantu riba nos beisbòl lokal i alabes kuminsá promové nos selekshon nashonal. Nos direktiva ta di opinion ku nos selekshon nashonal ta netamente e instrumento pa hiba nos beisbòl na e siguiente nivel. P’esei nos no por sinta i laga oportunidatnan riba e área aki pasa bai laga nos.

Pa direktiva di FEBEKO ta importante pa por tin transparensia i bon komunikashon tantu paden komo pafó di FEBEKO. P’esei semper nos ta pará habrí pa kontesta kualkier pregunta òf pa aklará kualke punto ku no ta sufisiente kla. FEBEKO ta haña lamentabel ku durante di un proseso di deliberashon interno ku su miembronan, e mester tuma nota di kosnan inkorekto i for di konteksto ku ta bai rònt. Es mas, te na e momentunan aki no tin un desishon definitivo enkuanto kampionato 2021.

Pa klousurá, direktiva semper a i lo sigui involukrá su miembronan den e proseso pa yega na desishonnan. Direktiva ta konsiente tambe ku den e proseso pa yega na un desishon semper bai por tin diferensia di opinion. Lokual ta importante pa direktiva ta ku e desishon ku nos yega na dje mester ta unu responsabel i ku ta na bienestar di e totalidat. Direktiva no ta para pa un maneho iresponsabel di krea debe i/o hasi promesanan ku no ta realisabel.

Login