Willemstad——–Disney Dreams ta bira e promé barku di turista ku ta mara i lo usa nos terminal di Bullenbaai komo base temporal.  E kompania a saka e barku for di operashon pa un temporada indefiní. E barku lo mara na Jeti 2 sin ku tin pasahero ku ta subi òf baha.

Durante di e periodo ku e ta mará na Bullenbaai, e mester kumpli ku e protokòl stipulá ku ta rigi presensha di un barku pa outoridatnan di gobièrnu den kuadro di Kòrsou su maneho pa mitigá presensha di COVID-19.

E terminal na Bullenbaai ta ofresé posibilidat pa 6 barku similar mara einan sin ku esaki ta stroba tankeronan di karga of deskargá na e terminal.  Uso di e fasilidatnan aki no ta peligrá e proseso pa yega na un partner pa garantisá un futuro duradero pa nos industria petrolero.  Esaki ta otro prueba di Refineria di Kòrsou su esfuerso pa maksimalisá uso di e infrastruktura ku e kompania tin bou di su maneho.

Disney Dreams ta un barku di turista di Disney Cruise Line.  Lo e permanesé na Kòrsou ku un tripulashon abordo redusí di 177 persona.  E barku ta nabegá for di 2011 i ta krusa den awanan di Karibe habitualmente.   E barku tin un largura di 340 méter i ta pisa 128,690 tòn. Su kapasidat máksimo di turista ta aproksimadamente 4000 okupante. 

Presensha di Disney Dream na Kòrsou ta danki na koperashon entre RdK, Curaçao Ports Authority (CPA) i Curacao Refinery Utilities (CRU) pa aktivamente traha riba uso mas optimal di e potensial aki na Bullenbaai. Ta traha estriktamente ku e.o. Ministerio di Salubridat, Medio Ambiente i Naturalesa, CPO, Outoridat Marítimo i Selikor.  No ta eksluí e posibilidat ku den e periodo benidero lo por mira mas barku di turista bin usa Bullenbaai komo nan base temporal. 

Bullenbaai ta brinda oportunidat ekselente pa 6 di e tipo di barkunan aki mara (segun e double banking method) na e terminal.