Punda—Djabièrnè awor, sekretario di estado pa Relashon Interior  i Asuntunan den Reino, Raymond Knops lo anunsiá su “Instituto Finansiero” kual lo  wòrdu implementá na Kòrsou. Ta trata di lokual minister Kenneth Gijsbertha a anunsiá luna pas”a, Kòrsou lo bai ta na rudia.

Manera ya menshoná, Hulanda a laga e Akuerdo di Kresementu firmá na yüli 2019 ku Kòrsou kai. Knops, ta pensando den mas reformashon finansiero ku mas impakto na Kòrsou. Despues ku Knops a manda su karta bisa parlamento ulandes ku e ta sigui e desaroyonan aktual, na Kòrsou, ya kaba por haña un idea ku Ulanda no tei laga los.  Ademas ta konosí ku e komishon di supervishon Cft entretantu a ekspresá nan deseo pa bini ku un komishon di supervishon tambe pa e 4 leinan hudisial di konsenso.  Tantu e kòntròl finansiero komo esun hudisial di Kòrsou lo ta kompletamente den man di Den Haag i liñanan di maneho no demokrátiko. Introdukshon di un sistema similar lo nifiká ku hustisia na Kòrsou lo ta kompletamente bou di supervishon unda minister di hustisia su poder demokrátiko lo wòrdu limitá mas tantu ainda.

Tardi òf tempran durante 2020, Kòrsou lo risibí un instrukshon riba su maneho finansiero. Durante e último rueda di prensa, presidente di Cft, Raymon Gradus a atmití ku e parti organisatorio den nos maneho finansiero, mester di drechamentu. E kousa en bèrdat por ta pa motibu di mal organisashon, segun Gradus a duna di konosé. E intenshon di Knops, lo sali pafó di e Leinan di Konsenso i ta mas dirèkt pa influensha maneho di Kòrsou.

E Leinan di Konsenso implementá na 2010, nunka no a kondekorá e parti humano durante nan ehekushon. Pa tal motibu, ningun di e 5 leinan no a logra drecha ni e maneho finansiero pero tampoko e maneho hudisial na Kòrsou. E problema ta unu simpel pa komprondé. No por supervisá sin ehekushon organisatorio. Falta di organisashon rondó di Maneho Finansiero, por ta unu dje faktornan ku Kòrsou no por kumpli ku eksigensha nan imponé pa e Lei di Konsenso pa Supervishon Finansiero.  Segun Gradus, organisashon, por ta unu dje faktornan ku ta stroba e maneho finansiero sano na Kòrsou. Gradus su kontenido ta kuadra kompletamente ku realidat. Diseño di e Leinan di Konsenso, tantu esnan hudisial komo finansiero a kuminsá for di 2007. Despues di 3 aña di planifikashon, na yüli 2010 nan a keda ofisialisá komo leinan den Reino. Durante planifikashon di e leinan i nan ehekushon, nunka niun eksperto no a pensa riba “implementashon”. I pa implementá un lei, kual ta rekerí kambio nan den organisashon, mester diseñá e parti aki tambe.

Knops ku hopi preshon riba Gijsbertha na yüli próksimo

Raymond  Knops, ku su intenshon lo hasi  ministernan di Hustisia i di Finansas Públiko den Fòrti di Amsterdam  “mènedjernan ehekutivo di Den Haag”. Knops sin duda algun, lo uza e Lei di Konsenso pa Supervishon Finansiero komo su èrmènt prinsipal, esaki naturalmente despues ku Kòrsou mes a bai di akuerdo pa prolongá e lei. Manera ta konosí, 3 di yüli próksimo, e sekretario di estado lo anunsiá su “plan nobo” pa Kòrsou.

Despues ku aña pasá, e konsultent públiko na Den Haag, Mark Dierekx a konsehá pa prolongá e lei di konsenso finansiero pa 3 aña mas, Cft a lansa un rueda di prensa luna alegando peliger di un instrukshon konkreto riba maneho di Gijsbertha. E presidente di Cft, Raymond Gradus, despues ku su paisano Dierekx a laga prolongá e lei di finansas, a sigui ku e kòntròl riba finansas públiko pa 3 aña mas. Ta bon pa apuntá ku e presidente di e komishon ku a alargá e lei finansiero ta ulandes miéntras e sekretario di e komishon ta Andrea Ruiter i Martijn Hilbrands, ámbos di ministerio asuntunan interior ulandes.  Ku esaki, Ulanda a ekstendé nan posishon komo mènèdjer di Willemstad miéntras e supervishon fo’i Den Haag keda na vigor. Riba esaki, Knops lo no trese niun kambio den su proposishon kual lo e presentá na Hunta di Minister di Reino, djabièrnè awor.